焦冷氣團𤆬來的好天氣

 2024/12/09 初稿

(1) 冬天星座之王一獵戶(la̍h-hōo)  奧里尪(Orion )

鞍部東爿山崙仔頂的冬季銀河、獵戶座 hām 金牛座。佇金牛的牛角跤兜仔彼粒足光的星是木星。

Pentax K5 (full spectrum mod.) , 685nm IR-cut, Samyang 16mm , 1min x 30 攏總曝光30分鐘

11月27 拜三

這波通過台灣的高壓氣團焦冷，帶來連紲幾偌工的好天。拜三本來無拍算上山，不而過倚暗時看天氣實在傷好，無去看星拍損，毋閣臨時臨曜，若欲攢重兵器攢到齊去到面頂百面已經七晏八晏，就按呢我干焦輕裝紮相機起去翕廣角的天星帶地景。

山頂已有冬天的感覺矣，今暗袂記得戴手套，騎車來的時手指頭仔真凍。

本底今仔星友 Freeman 嘛欲起來鞍部，毋閣伊臨時愛加班，所以明日才會來。所以今眠干焦我孤一人享受滿天的天星。

實在講，進前十外年鞍部見擺好天的星夜定定嘛有只我一人做見證，雖然有時略略仔感覺希微，毋閣咱人佇曠闊的宇宙中凡勢註定就是愛孤獨的，孤獨是存在的必然，孤獨是意識的必然，孤獨是思考的必要，孤獨是創作的必要。

毋閣若共聊聊仔漂對外太空的元神搝轉來，星夜却亦是鬧熱滾滾--的，天星點點光映映，是樹頂近到伸手著挽會落來的果子，干焦我一人孝孤，四箍圍仔貓頭鳥佮杜猴的叫聲是田園交響曲，干焦我一人聽會著，誠實奢華。

立冬過了後每暗差不多九點跤兜奥里尪著已經升起來仿鞍部東爿的山崙仔頂矣，伊的腰帶排一列的三粒星特別好認。獵戶有一片誠大片的分子雲，遐是星胚仔的大產房，佇腰帶下跤無偌 hn̄g 的所在，有一搭用目睭著看會著的光跡(jiah)，彼著是獵戶座星雲(sing-hûn) M42，量其約離咱有一千五百光年，伊發出的光主要是分子雲予拄出世無偌久的少年星 (OB星) 所炤光，以及予 in 的高溫電離所致的螢光。若使用8"望眼鏡觀察，量其約50倍著有法度看著伊親像一隻展翅的火鳥的一部份外形，若用 300倍跤兜看就敢若親身坐份航行中的太空船向窗仔外透看，雲氣嶄然仔立體 [1]。

聽候獵戶完全昇起來了後，我共冬季銀河墘的金牛座與獵戶座掠入相機的視野，1張1分鐘曝光30外張，翕煞才十點外仔，下山閣會赴食宵夜。

(2) Drift 方法校正赤道儀極軸。Andromeda。

Andromeda 星系（sing-hē）M31

Pentax 75SDHF +0.72x Reducer

Pentax K5 (full spectrum mod.) + Astronomik L3_UV/Ir-cut  曝光一點鐘加Pentax K3II 曝光二點鐘 

11月28 拜四

中晝過看天頂非常清氣，是真飽滇鮮沢的紺色。我隨佇 line 建立活動招星友下暗鬥陣起去鞍部觀星。按算今暝欲用望眼鏡翕獵戶座大星雲(M42)佮仙女座星系(M31)。

我紮來的赤道儀是日本製的Pentax MS-3 [2]，大約是佇1991年至2000年之間的古董，斯當時的Pentax 天文設備毋管是外形抑是品質攏是無地嫌的jió-toh，就算是現此時佮市面的產品比起來猶原是佇頭前班袂落氣--的，不而過因為這台赤道儀干焦赤經軸有馬達，無法度利用我後頭買的MGENII 電子導星器來指揮雙軸馬達修正追蹤的偏差，干焦會使進行單軸的赤經軸 guiding 。因為這个緣故，若是欲載望遠鏡來翕相，著愛先將赤道儀對天球的極軸對予一必一中。若無，長時間的曝光的影像頂面的天星就袂保持是圓點。

Drift 方法是校正極軸的傳統技術，不而過往過是干焦有目睭通好掠算偏移量，現此時MGENII有支援Drift 的測量，變作非常的方便，佮較早比起來是天差地的差別。