《Sommerfeld 物理學 4 ： 光學》、《人生的三稜鏡》

最近逢梅雨季，除了偶爾拍拍太陽黑子沒進行什麼天文活動，倒是讀了不少書，前陣子利用近一個月的時間瀏覽了一遍 Longair 的 ‘Galaxy formation’，這幾天開始讀Sommerfeld《理論物理學 4--光學》中譯本。可能因為是經過學生的筆記整理的很濃縮，加上sommerfeld的敘述我覺得有點抽象，所以即使我讀的是中譯本，仍覺得Sommerfeld 原書實在不太易懂（倒不是因為簡體字的關係）。但看在他講的內容我覺得都很經典或我很想理解的東西，所以我還是靠著AI的輔助教學慢慢的閱讀，雖慢但持續有進展。但如果對於本書內容沒有強烈興趣的話，個人並不建議閱讀此書。

目前大約閱讀了1/4的內容，一開始是講利用邊界條來求折、反射的振幅比，Fresnel公式、Brewsten、全反射等，第一章讀者要注意的是Sommerfeld的偏振方向的古典定義與當代相反，他書中所謂的偏振面是指與電場振動方向垂直的那面！如他在第7節提到“例如，我們考慮p偏振，即E平行於z軸的情況”，因入射面是x,y，可知他說的其實是今日的s偏振，所以書中算式圖表中的S、P符號以今日的定義都要互換，一開始我花了不少時間在確認這件事，被搞得一團霧水。本書的前言譯介完全提及這件事。

然後接下書中介紹到對於我們玩天文很有關係的，薄膜、牛頓環，介紹了關於干涉鍍膜的設計公式，及Perot-Fabry干涉儀的原理與計算，很有趣也很實用，Solar Ha 的Etalon 濾鏡就是利用此原理，也是讀了這部分之後終於了解兩個鍍銀的反射面之前的間隙是精度相當高的，此外 FSR（Free Spectral Range）計算公式與前置或後置Ha濾鏡的設計要求；光駐波與第一個彩色攝影的發明的原理。

第二章則是天文專題，介紹了年視差與光行差，Doppler效應與Fresnel拖曳係數，Michelson實驗的計算及光量子裡論。

第三章則開始講色散原理。我靠著AI協助（原書的導法有點看不懂）終於做完利用Maxwell方程導出光在介質中傳導折射率與頻率（波長）的關係式後很有成就感，決定在這裡先休息一下。

-------

接著讀的是最近買的二手書，楊千鶴的《人生的三稜鏡》，這本自傳是楊千鶴於1993以日文寫成的，後來由張良澤與千鶴之女林智美翻譯成中文，我買的是前衛的版本。

楊千鶴出生於日治時期，一波三折、充滿意外的人生讓她的自傳足以成為一個動盪的時代的縮影。

在戰後意外被推舉當選了地方自治首屆的縣議員踏入政治領域，卻因此招來在地勢力競爭者的記恨，甚至招致身為台東糧食事務所的所長的丈夫遭受陷害而入獄。

這本自轉不但以自身經歷描述了一位女性如何在社會仍存在對女性在家庭中的勞動角色的根深蒂固的觀念與文化的啟蒙下自覺中摸索爭取自己的權利與未來，同時也見證了日治時代日本政府台灣人與日本人間的不公平對待，戰爭期間物資的匱乏與不時要進行空襲疏散的顛簸生活，與戰後國民政府初來到台灣的混亂與趁火打劫搜刮資源，後來發生的228對親戚朋友、人民的迫害。直到移居美國之後才停止了勞碌奔波充滿曲折的生活。

書中有些我覺得絕妙的文筆，譬如她把幻滅收場的初戀形容成任何人一生中總要得一次的麻疹等待退燒，實在形容的很妙。

還有她的二哥像是生活智慧王的開導：

「能得到幸福與否，全視結婚而定。幸福像是數學的方程式，人們的“欲望” 是分母，“努力”是分子，分子除以分母所得的商數便是“幸福”。所以若要使商數變得更大，最快的方法便是把分母弄小就行了。」

到大稻埕遶遶--下

今仔本底欲趁好天出門共這個月的工課做一捆收煞，不而過我的 オートバイ因為化油器歹去牽去オートバイ店修理愛到下-昏暗才會好，想想--的規去來去大稻埕踅街，去現流啉咖啡看册好矣。

將最近佇台灣e店買的台語册《臺灣女性人物群像》（作者：Hena Ma）囥入揹仔內，揹咧著去坐捷運，先去大橋頭食高麗菜飯 ká 排骨湯作下晝頓，今仔食較腥臊，加叫一个菜盤，食了真飽。

講起大稻埕，我想著今仔紮的册內有介紹著一位佇大稻程誠出名的女醫師(至少頂一輩應該足濟人知影)，伊的名叫做蔡阿信，伊是台灣第一個查某醫生。伊出世佇日本時代的艋舺，自細漢著表現出真獨立倔強的個性，在伊五歲時in 阿母欲共伊送予大浪泵的1位牧師作新婦仔，結果伊家己煞走轉去艋舺2改，in阿母只好放棄。

伊8歲時讀大稻埕公學校（這馬的太平國小），大漢了後去東京女子醫學專門學校讀册，1921年轉來台灣，蹛佇日新町，1924年佇遐開診所，兩年後才落去台中。

前1站仔我去蔣渭水基金會上大稻埕文史導覽員的課時，基金會的老師/資深導覽員tshuā 阮踅街時就講著蔡阿信，講敢若揣著伊較早蹛的所在，講到誠歡喜。

彼本册內擱講到蔡阿信後來蹛加拿大的代誌，伊七十八歲時猶佇坐巴士去學代數，伊講彼是伊毋捌的物件，伊想欲去試看家己有法度理解無。我真欣賞這款食到老猶原不時想欲學物件的態度，真值得咱來學習。

春天的星系漫遊 II

3/23

今仔天氣uan-na 袂䆀。

昨天看氣象報寫講這站仔的好天可能到拜三才會變天，著決定安排觀星一工休睏一工，按呢拜五、今仔佮下禮拜二攏總會當上山看星三暗擱袂忝。

下昏暗的計劃是先趁暗頭仔獵戶座猶未落山進前好好欣賞M42星雲彼隻火鳥，紲落去才擱繼續星系漫遊。

到鞍部時看著小觀音山電視台彼葩刺目的大燈擱tōh著--ê，彼葩燈火是幾年前才有的，伊佮運動埕的金鹵灯抑是魚船的集魚灯光度欲仝仔欲仝，所以若tōh著--ê會變成東北爿的光害。好咧佳哉伊毋是逐暗開，曷若有光的日子通常欲倚九點彼跤兜仔，上加是翻點前就會關掉，罕得著歸暝。

現此時獵戶座佇西爿，所以小觀音山彼葩電火袂有啥影響。先用低倍率的60倍觀察M42 星雲，無加濾鏡時火鳥中心四合星的四箍圍仔的星雲就誠顯目，毋擱加濾鏡了後連翼股的頭前沿嘛看會著，而且四合星附近的雲氣的光度並無啥變暗，會使推論遮的光線主要是OIII的螢光。

紲落來換百二倍來觀察，這時四合星東北邊有一節真突出的部份，暗眠摸啥物攏無，彼是一節敢若竹筍的暗星雲，佮伊成強烈對比的四周圍發光的雲氣分明有無仝光度的區域，誠成山田，其中東南爿有一逝誠直、又明顯的落坎分界，向這片四方仔四方的雲氣南爿巡去，過四合星了後裂開一條敢若田溝的暗帶。拍鐵趁燒，換二百四十倍懸倍來看，感覺又變完全無仝，雲氣現出紋理，袂輸蟬仔經絲，擱成棉絲仔糖，立體若在眼前。

看煞M42，翻頭看小觀音山彼葩電火毋知啥物時陣已經熄去，九點捅，石頭的oo-tóo-bái嘛到停車場矣。我將望眼鏡轉向北斗七星，準備繼續星系的漫遊。

先位離天樞星大約10度的M81佮M82，現此時拄好佇正北爿。今暝的透明度無拜五好，感覺夜空有一沿薄縭絲的水氣，毋擱欲看著這2个星系無問題，佇XW40目鏡、60倍的視野內拄好會使同時看著in，其中較小的彼粒是M42，看起來略仔成扁豆仔，伊的中央有淡薄仔缺角，東爿較光，毋擱光度無講蓋平均。M82加大箍誠濟，但是透明度無好的情況下干焦星系中心明顯。

春天的星系漫遊 I

3/21

春天的暗暝，北斗七星早早著peh起去小觀音山的山尾溜，位北斗星／大熊座開始，向南經過獵狗座、（Berenice的）頭鬃座、獅仔座、室女座、烏鴉座到半人馬座為止，一條差不多三十度闊，自北迵到南爿的夜空範圍，星系揢到插插插。佇鞍部天清的暗暝，你若是用8"的望遠鏡，至少會使看著其中幾若十粒光度較光的星系，自北到南一粒一粒寬寬仔欣賞，袂輸春天佇河津川的步岸散步欣賞櫻花，誠是美不勝收。

我共按北斗星開始的這逝眼視觀星路線號做春天的星系走健。

曷若是共這逝星系步岸向北斗星的北爿延伸，佮秋冬的玉夫座、天爐座、波江座內面的彼寡星系連做伙，這歸大逝的星系會當用8‘’鏡佇鞍部看著的就攏總至少有100个以上（個人目前佇鞍部眼視素描的記錄）。

我定定佇腦海內思想這條星系集倚的款勢，敢若看會著彼个大尺度的結構一包含咱的銀河系所屬的室女座超星系團 (Virgo Supercluster)[1]。好比旋藤的kazura，湠延一億光年。

下-昏暗的天氣誠好，山頂雖然溫度無到十度，不而過無啥風，所以並袂真寒，我特別紮我的Takahashi µ-210 起來鞍部，著是想欲溫習夜空中的這逝星系步岸，另外就是想欲用8" 鏡看有法度看著前幾工佇"Galaxy fromation" 這本册頂看著的兩个超級大龐的橢圓星系一 NGC 4874 佮NGC 4889 無？

In 的位置佇離咱有3億外光年的頭鬃座超星系團 (Coma Supercluster)的中央，雖然離遐遠，毋擱因為這兩粒星系中央誠光（無怪in 有另外一種稱呼號做central dominant galaxies），加上in的星等有12等，算不止仔光，所以真有機會透過8"望遠鏡親目看著。

七點捅到停車場，星友文正早已經tshāi好伊彼隻S50 智慧望眼鏡佇走另類的Messier 寫真馬拉松，著是拍算佇一暗的時間以內將110个Messier 天體翕起來，因為這寡天體佇天頂分佈的位置的特性，一年當中干焦佇春分前後這段期間有法度佇一暗內看著全部。毋擱因為鞍部的東西爿kē 的所在攏有遮閘 (也是遮光害較小的原因)，所以出日前佮日頭落山後彼陣子佇地平附近的天體就看袂著，欲共全部 Messier 天體 hôo起來誠困難。

我共赤道儀、望遠鏡組立起來，對好極軸了後先泡一碗麻油雞泡麵來食，看夜色猶未全暗，先將望遠鏡對準北斗七星的戽杓尾附近的M51 星系觀察。其實普通時咱講的M51實在包括2个星系，M51捲螺仔旋星系佮佇伊北爿邊，袂輸予M51上外面的旋股牽著的，細粒誠濟的NGC 5194星系，相片看起來親像一隻露螺。毋擱透過望遠鏡用目睭看的無仝，愛佇無光害的所在才有可能看著in彼逝互相干涉的旋股。

九點捅，鞍部西爿、大屯山頂的Orion 佮冬天大三角

北爿的大、小熊座真明顯

今仔的seeing 佮透明度攏真讚，將望眼鏡的視野徒去M51的所在連鞭就看著兩个足光的星系仁，共孜孜相一睏仔，目睭習慣暗度了後，略略仔看會出位M51星系仁向東向伸出的1節旋股，使用averted vision的技巧(一種斜目看的技術)，另外伊倚NGC 5194彼爿，看會出佇2个星系中間有一段旋股，殕殕仔若有若無。

焦冷氣團𤆬來的好天氣

 2024/12/09 初稿

(1) 冬天星座之王一獵戶(la̍h-hōo)  奧里尪(Orion )

鞍部東爿山崙仔頂的冬季銀河、獵戶座 hām 金牛座。佇金牛的牛角跤兜仔彼粒足光的星是木星。

Pentax K5 (full spectrum mod.) , 685nm IR-cut, Samyang 16mm , 1min x 30 攏總曝光30分鐘

11月27 拜三

這波通過台灣的高壓氣團焦冷，帶來連紲幾偌工的好天。拜三本來無拍算上山，不而過倚暗時看天氣實在傷好，無去看星拍損，毋閣臨時臨曜，若欲攢重兵器攢到齊去到面頂百面已經七晏八晏，就按呢我干焦輕裝紮相機起去翕廣角的天星帶地景。

山頂已有冬天的感覺矣，今暗袂記得戴手套，騎車來的時手指頭仔真凍。

本底今仔星友 Freeman 嘛欲起來鞍部，毋閣伊臨時愛加班，所以明日才會來。所以今眠干焦我孤一人享受滿天的天星。

實在講，進前十外年鞍部見擺好天的星夜定定嘛有只我一人做見證，雖然有時略略仔感覺希微，毋閣咱人佇曠闊的宇宙中凡勢註定就是愛孤獨的，孤獨是存在的必然，孤獨是意識的必然，孤獨是思考的必要，孤獨是創作的必要。

毋閣若共聊聊仔漂對外太空的元神搝轉來，星夜却亦是鬧熱滾滾--的，天星點點光映映，是樹頂近到伸手著挽會落來的果子，干焦我一人孝孤，四箍圍仔貓頭鳥佮杜猴的叫聲是田園交響曲，干焦我一人聽會著，誠實奢華。

立冬過了後每暗差不多九點跤兜奥里尪著已經升起來仿鞍部東爿的山崙仔頂矣，伊的腰帶排一列的三粒星特別好認。獵戶有一片誠大片的分子雲，遐是星胚仔的大產房，佇腰帶下跤無偌 hn̄g 的所在，有一搭用目睭著看會著的光跡(jiah)，彼著是獵戶座星雲(sing-hûn) M42，量其約離咱有一千五百光年，伊發出的光主要是分子雲予拄出世無偌久的少年星 (OB星) 所炤光，以及予 in 的高溫電離所致的螢光。若使用8"望眼鏡觀察，量其約50倍著有法度看著伊親像一隻展翅的火鳥的一部份外形，若用 300倍跤兜看就敢若親身坐份航行中的太空船向窗仔外透看，雲氣嶄然仔立體 [1]。

聽候獵戶完全昇起來了後，我共冬季銀河墘的金牛座與獵戶座掠入相機的視野，1張1分鐘曝光30外張，翕煞才十點外仔，下山閣會赴食宵夜。

(2) Drift 方法校正赤道儀極軸。Andromeda。

Andromeda 星系（sing-hē）M31

Pentax 75SDHF +0.72x Reducer

Pentax K5 (full spectrum mod.) + Astronomik L3_UV/Ir-cut  曝光一點鐘加Pentax K3II 曝光二點鐘 

11月28 拜四

中晝過看天頂非常清氣，是真飽滇鮮沢的紺色。我隨佇 line 建立活動招星友下暗鬥陣起去鞍部觀星。按算今暝欲用望眼鏡翕獵戶座大星雲(M42)佮仙女座星系(M31)。

我紮來的赤道儀是日本製的Pentax MS-3 [2]，大約是佇1991年至2000年之間的古董，斯當時的Pentax 天文設備毋管是外形抑是品質攏是無地嫌的jió-toh，就算是現此時佮市面的產品比起來猶原是佇頭前班袂落氣--的，不而過因為這台赤道儀干焦赤經軸有馬達，無法度利用我後頭買的MGENII 電子導星器來指揮雙軸馬達修正追蹤的偏差，干焦會使進行單軸的赤經軸 guiding 。因為這个緣故，若是欲載望遠鏡來翕相，著愛先將赤道儀對天球的極軸對予一必一中。若無，長時間的曝光的影像頂面的天星就袂保持是圓點。

Drift 方法是校正極軸的傳統技術，不而過往過是干焦有目睭通好掠算偏移量，現此時MGENII有支援Drift 的測量，變作非常的方便，佮較早比起來是天差地的差別。

逐長尾星（二）大屯山

 整理中

2024/11/2 初稿

 

＊本篇為漢羅台文。（本篇統一以“的”替代“ê”）

**2024/10/18

ATLAS 長尾星 2.8~3.5等  (S-O-T 38.5度)

大屯山主峰

PM 7:33

Pentax K3II+FA77

Pentax K5+FA31

Pentax K5+FA31(46mm)

下晡三點外阮著到大屯山鞍部，位遮的登山口開始 peh 主峰較近，(若位二子坪遐行車道是加箍一輪，不而過暗時行車道較安全)。自遮peh 到頂仔才升二百外公尺懸，揹十迵公斤的設備teh peh 石級仔並無感覺會忝。

拄開始石級仔兩爿是密喌喌比人懸的劍竹（kiàm-tik），路彎來斡去，干焦看會著一線天，愛行倚三分之一才會看會著山頭，這改阮peh 一段路著行去接車道，車道闊，風吹了較涼，雙爿路邊攏是白蔥蔥的菅芒，日頭有時現現連鞭著覕佇雲內，雺霧一層一層，我臆阮已經行入雲裡。

掠準台北明仔載開始欲變天矣，我佮大漢囝Eric 約今仔 來peh 大屯山主峰翕長尾星。其實，這個月到今(tann)攏無真正適合觀星的好天氣，只是因為本來就計劃欲peh 大屯山翕長尾，而且翕長尾星是有時間性的。食晝完我著開始準備欲揹去山頂的設備，前幾工佇大直翕干焦用著1台相機，這逝我按算欲用三台相機，因為Eric伊講伊嘛欲翕看覓(māi)，所以其中1台隨身機仔規氣予伊操作，我專心顧二隻著好，才袂無閒起來掠龜走鱉，擱紮2組三跤馬佮雲台，行動電源、二條快門線、除霧帶……哩哩扣扣連登山背包（ting-san puè-pau）加起來差不多十公斤。

到主峰觀景台時猶早，習慣性先將器材組立起來等，大略仔教Eric 相機的操作佮參數設定，著予伊家己去試耍。雺霧猶是真大，毋擱無落雨著有機會，阮拍算欲等到七點。

草山的菅芒當佇開花，規山坪齊是，白花摻有紅穗真特別，聽講草山的芒花會紅是因為規年迵天硫磺氣佇薰，除了白背芒，硫磺正是草山另外1个特殊的景色。

論真講，四百年前，1626年來台灣的西班牙人著捌有寫日記講蹛佇大屯山跤的北投社、Pantao、淡水社(凱達格蘭族部落) 攏有佇生產硫磺。

幾十年後，佇1697年清國人郁永河趁著機會渡過黑水溝嘛來台灣北投採硫磺轉欲去做火藥，伊寫的日記就號作《採硫日記》(嘛叫作《裨海紀遊》)，內底有寫著「麻少翁、內北投在磺山左右，毒氣蒸鬱，觸鼻昏悶……」。伊到北投看著大屯山的景色時留下「丹山草欲燃」的詩句，可能是形容予硫氣薰紅色的菅芒，也有能是指透早抑是黃昏日頭炤佇規山的芒草的景色。

講到遮，若斟酌共看，予照著的花因為日光的色溫變成黃金色，若火佇燒，若無予日頭炤著的芒花就像白雪點點崁佇山頭，是二種無仝毋擱會鬥陣出現、誠媠的景色。

看時間這馬應該是差不多日頭欲落海的時間矣，但是雲擱共太陽閘牢牢，親像挑工欲創治咱，山雺不時位面天山、西峰前，薄薄仔，是阿娘仔交落的一條絲巾仔予風向北爿吹過。

佇阮腳踏的這个觀景台的下面是大屯坪，伊佮面天山之間有1條面天古路，向北會使通到二子坪、巴拉卡公路，向南是落去到北投清天宮，在Eric 細漢的時我就捌伊位清天宮彼爿行起來二子坪，歸路攏有樹蔭，囝仔peh 起來嘛袂喝忝，真適合親子運動。路上面天坪附近有一个古早石厝的遺跡，管理處捌倩考古專家去挖掘、做碳十四測量，發現遐有二个不仝年代的文化層，1个佇2000年前左右(植物園文化、圓山文化彼跤兜)，1个是近代，二、三百前的平埔族至漢人時代之間。

這結果表示佇足早進前著有人蹛佇大屯坪。無的確某位尪姨（半滾耍笑的，毋擱"北投"這个詞正是位平埔族巴賽語Kipataw來的，是“女巫”的意思，嘛有一講是“施法”的意思）捌好玄peh-起來徛佇遮山頂眺望，或者將裊裊硫氣當作妖氣對伊做法。hiang-時的人看出去的山景佮這馬可能差不多，只是山跤時景就完全無仝，四箍圍仔攏有鹿仔teh 走的草埔、樹林仔，淡水河頂有蟒甲船佇行，大屯山跤、淡水、基隆河北墘平埔族幾十社，南爿可能捌是一个大湖。亦無的確二千外年前著有平埔族來到遮(台灣輸血醫學之母林媽利捌透過DNA研究，伊認為差不多四千五百前開始平埔族著陸續來到台灣)。甚至擱較早，欲倚五千五百年前的大坌坑文化的人嘛可能佇遮看過仝款菅芒的景色，因為大屯火山的活動大約仔佇20萬年前著結束，開始休眠矣。五千五百年前位大屯山跤到淡水海岸攏有誠濟大坌坑文化的部落，我讀過劉益昌的《芝山岩遺址與臺北史前》[1]，冊內有一張地圖標出大屯山火山群四箍輾轉位東北至南爿、沿淡水海岸到基隆河以北的角勢，攏有新石器時代大坌坑文化遺址，密密是的點我到今印象猶誠深刻。