到大稻埕遶遶--下

今仔本底欲趁好天出門共這個月的工課做一捆收煞，不而過我的 オートバイ因為化油器歹去牽去オートバイ店修理愛到下-昏暗才會好，想想--的規去來去大稻埕踅街，去現流啉咖啡看册好矣。

將最近佇台灣e店買的台語册《臺灣女性人物群像》（作者：Hena Ma）囥入揹仔內，揹咧著去坐捷運，先去大橋頭食高麗菜飯 ká 排骨湯作下晝頓，今仔食較腥臊，加叫一个菜盤，食了真飽。

講起大稻埕，我想著今仔紮的册內有介紹著一位佇大稻程誠出名的女醫師(至少頂一輩應該足濟人知影)，伊的名叫做蔡阿信，伊是台灣第一個查某醫生。伊出世佇日本時代的艋舺，自細漢著表現出真獨立倔強的個性，在伊五歲時in 阿母欲共伊送予大浪泵的1位牧師作新婦仔，結果伊家己煞走轉去艋舺2改，in阿母只好放棄。

伊8歲時讀大稻埕公學校（這馬的太平國小），大漢了後去東京女子醫學專門學校讀册，1921年轉來台灣，蹛佇日新町，1924年佇遐開診所，兩年後才落去台中。

前1站仔我去蔣渭水基金會上大稻埕文史導覽員的課時，基金會的老師/資深導覽員tshuā 阮踅街時就講著蔡阿信，講敢若揣著伊較早蹛的所在，講到誠歡喜。

彼本册內擱講到蔡阿信後來蹛加拿大的代誌，伊七十八歲時猶佇坐巴士去學代數，伊講彼是伊毋捌的物件，伊想欲去試看家己有法度理解無。我真欣賞這款食到老猶原不時想欲學物件的態度，真值得咱來學習。

今仔天氣誠好，天真清，真鮮沢的紺色，擱有風，佇日頭骹行路嘛袂流汗，我先斡入去迪化街仔，向南寬寬仔行，不時會嚊著中藥材的芳味，賣台灣LV(茄芷袋)的高建門口猶是揢誠濟觀光客。一路巡落來，加真濟新開的店，裝潢攏誠時行，不止仔有設計感，佮百年的建築擱會鬥搭，袂礙虐。

隨意揀1間賣茶甌仔等等民藝品的店（民藝埕）行入去遶遶--下，2進佇展賣林再興司的交趾陶創作，誠媠誠不而過無俗，心理暗想後擺若換新厝才買1件來排（想罔想，猶是較早睏較有眠）。

行到鈕仔公園邊的現流册店，今仔店長佇咧，我入門隨點一杯冰的LATTE，坐落來共《臺灣女性人物群像》提出來，店長看著册阮2个著開講起來。伊講著誠意有才華的楊千鶴，講感覺伊是做什麼事業攏會成功的女性，我真認同。

大正時代出世的楊千鶴細漢時捷破病，伊阿母決定按風俗欲送予別人飼，結果伊毋願逐暗攏佇哭，養爸只好放棄將伊送轉去，這種倔強個性共蔡阿信誠成。册內寫講伊真gâu讀册，位臺北女子高等學院出業了後朋友介紹伊去臺北帝國大學做研究助理，毋擱無外久伊發現伊的月給比日本人較低，感覺誠無公平著辭職。

等伊欲引第2个工課--《臺灣日日新報》的專欄記者，應徵的時伊就要求共日本人相仝的月給，西川滿因為肯定伊的才華著錄取伊。一直到1942年因為二戰關係報社愛配合軍國主義的指導，楊千鶴著離開報社。結婚了後去做議員，毋擱去得失著國民黨，in 翁煞予人陷害入監，佳哉一冬著予大赦。

戰後因為國民黨的國語政策，伊著無擱再發表作品，一直到解嚴了後才擱用日文寫文章，彼時陣伊的心願是有一工會當用台語來寫文章，可惜1993年伊出版伊的自傳《人生的三稜鏡》時猶是用伊會曉的日文寫成。伊若是活佇現代，看著這馬台文出版品若春天花誠健欉應該會真歡喜。

講起文采，册內猶擱有寫著澎湖第一才女蔡旨禪（讀到遮我就想著佇昭和時代出世臺灣的文學少女黃鳳姿，可惜這本册並無介紹伊的故事。）

蔡旨禪無去公校上課，學問攏是位私人的漢塾學來的，伊詩畫攏誠務khiàng，後來過來台灣設平權軒教漢學，伊的作品得著霧峰林家的呵咾，林獻堂嘛贊助伊去廈門進修。

不而過伊五十外歲轉去澎湖時發現祖厝的佛堂澄源堂去矛國民政府的軍隊佔去，伊佮伊阿兄鬥陣向政府提出告訴，經過1、2冬才討轉來。

親像佛堂、廟仔去予國民政府的軍眷佔去這款譀古代誌佇國民政府拄來台灣的頭幾十年內真素常，就我所知的，大浪泵的保安宮位民國三十九年著予軍眷佔去，擱佇內底隔間攏總二百捅戶，一直到五十五年才遷走。

佇日本時代出世的誠有才華的女性當中，一定袂使毋知影畫日本畫（膠彩畫）的陳進，有佇接觸臺灣藝術的人應該攏知影台展三少年，陳進就是其中1个。

幾個月前去參觀北美館的臺灣百年的膠彩畫展，著有幾幅陳進的作品，導覧的高永隆老師本身就有作品參展，伊滾耍笑講因為膠彩畫的色彩愛等頂沿完全焦了後才會當畫另外一沿，顏料袂使相透濫，所以逐个畫家攏去予磨出耐性，性地誠好，攏活了誠長歲壽，若無九十著算夭折矣。我轉厝了後上網路查，真正台展三少年林玉山、陳進、郭雪湖甚至「臺灣膠彩畫之父」林之助，攏活超過九十歲（敢是千拄千爾爾?）。

高老師擱講著是因為膠彩畫無像水彩顏料會使相摻調色，膠彩的顏料每一種色攏愛分開買，所以畫家佇下筆進前著愛先想好欲用叨幾種色，先攢好，伊講in 兜有一面壁廚攏是排顏料。膠彩的顏料擱不止仔貴，我 teh 想有才調畫膠彩的人應該像陳進仝款，厝--下攏有一tè，若無連鞭著會破產。

我佇現流看册、寫字，一直到暗來才離開。

轉到厝先去提新台票去車行贖オートバイ（好哩佳哉見擺故障攏是到厝了後抑是停佇厝的時，毋是牢 teh 山頂看星的時。算誠好運矣，當作是破財消災囉），然後招囡仔做伙來去jogging，趁猶未變天進前。