逐長尾星（二）大屯山

 整理中

2024/11/2 初稿

 

＊本篇為漢羅台文。（本篇統一以“的”替代“ê”）

**2024/10/18

ATLAS 長尾星 2.8~3.5等  (S-O-T 38.5度)

大屯山主峰

PM 7:33

Pentax K3II+FA77

Pentax K5+FA31

Pentax K5+FA31(46mm)

下晡三點外阮著到大屯山鞍部，位遮的登山口開始 peh 主峰較近，(若位二子坪遐行車道是加箍一輪，不而過暗時行車道較安全)。自遮peh 到頂仔才升二百外公尺懸，揹十迵公斤的設備teh peh 石級仔並無感覺會忝。

拄開始石級仔兩爿是密喌喌比人懸的劍竹（kiàm-tik），路彎來斡去，干焦看會著一線天，愛行倚三分之一才會看會著山頭，這改阮peh 一段路著行去接車道，車道闊，風吹了較涼，雙爿路邊攏是白蔥蔥的菅芒，日頭有時現現連鞭著覕佇雲內，雺霧一層一層，我臆阮已經行入雲裡。

掠準台北明仔載開始欲變天矣，我佮大漢囝Eric 約今仔 來peh 大屯山主峰翕長尾星。其實，這個月到今(tann)攏無真正適合觀星的好天氣，只是因為本來就計劃欲peh 大屯山翕長尾，而且翕長尾星是有時間性的。食晝完我著開始準備欲揹去山頂的設備，前幾工佇大直翕干焦用著1台相機，這逝我按算欲用三台相機，因為Eric伊講伊嘛欲翕看覓(māi)，所以其中1台隨身機仔規氣予伊操作，我專心顧二隻著好，才袂無閒起來掠龜走鱉，擱紮2組三跤馬佮雲台，行動電源、二條快門線、除霧帶……哩哩扣扣連登山背包（ting-san puè-pau）加起來差不多十公斤。

到主峰觀景台時猶早，習慣性先將器材組立起來等，大略仔教Eric 相機的操作佮參數設定，著予伊家己去試耍。雺霧猶是真大，毋擱無落雨著有機會，阮拍算欲等到七點。

草山的菅芒當佇開花，規山坪齊是，白花摻有紅穗真特別，聽講草山的芒花會紅是因為規年迵天硫磺氣佇薰，除了白背芒，硫磺正是草山另外1个特殊的景色。

論真講，四百年前，1626年來台灣的西班牙人著捌有寫日記講蹛佇大屯山跤的北投社、Pantao、淡水社(凱達格蘭族部落) 攏有佇生產硫磺。

幾十年後，佇1697年清國人郁永河趁著機會渡過黑水溝嘛來台灣北投採硫磺轉欲去做火藥，伊寫的日記就號作《採硫日記》(嘛叫作《裨海紀遊》)，內底有寫著「麻少翁、內北投在磺山左右，毒氣蒸鬱，觸鼻昏悶……」。伊到北投看著大屯山的景色時留下「丹山草欲燃」的詩句，可能是形容予硫氣薰紅色的菅芒，也有能是指透早抑是黃昏日頭炤佇規山的芒草的景色。

講到遮，若斟酌共看，予照著的花因為日光的色溫變成黃金色，若火佇燒，若無予日頭炤著的芒花就像白雪點點崁佇山頭，是二種無仝毋擱會鬥陣出現、誠媠的景色。

看時間這馬應該是差不多日頭欲落海的時間矣，但是雲擱共太陽閘牢牢，親像挑工欲創治咱，山雺不時位面天山、西峰前，薄薄仔，是阿娘仔交落的一條絲巾仔予風向北爿吹過。

佇阮腳踏的這个觀景台的下面是大屯坪，伊佮面天山之間有1條面天古路，向北會使通到二子坪、巴拉卡公路，向南是落去到北投清天宮，在Eric 細漢的時我就捌伊位清天宮彼爿行起來二子坪，歸路攏有樹蔭，囝仔peh 起來嘛袂喝忝，真適合親子運動。路上面天坪附近有一个古早石厝的遺跡，管理處捌倩考古專家去挖掘、做碳十四測量，發現遐有二个不仝年代的文化層，1个佇2000年前左右(植物園文化、圓山文化彼跤兜)，1个是近代，二、三百前的平埔族至漢人時代之間。

這結果表示佇足早進前著有人蹛佇大屯坪。無的確某位尪姨（半滾耍笑的，毋擱"北投"這个詞正是位平埔族巴賽語Kipataw來的，是“女巫”的意思，嘛有一講是“施法”的意思）捌好玄peh-起來徛佇遮山頂眺望，或者將裊裊硫氣當作妖氣對伊做法。hiang-時的人看出去的山景佮這馬可能差不多，只是山跤時景就完全無仝，四箍圍仔攏有鹿仔teh 走的草埔、樹林仔，淡水河頂有蟒甲船佇行，大屯山跤、淡水、基隆河北墘平埔族幾十社，南爿可能捌是一个大湖。亦無的確二千外年前著有平埔族來到遮(台灣輸血醫學之母林媽利捌透過DNA研究，伊認為差不多四千五百前開始平埔族著陸續來到台灣)。甚至擱較早，欲倚五千五百年前的大坌坑文化的人嘛可能佇遮看過仝款菅芒的景色，因為大屯火山的活動大約仔佇20萬年前著結束，開始休眠矣。五千五百年前位大屯山跤到淡水海岸攏有誠濟大坌坑文化的部落，我讀過劉益昌的《芝山岩遺址與臺北史前》[1]，冊內有一張地圖標出大屯山火山群四箍輾轉位東北至南爿、沿淡水海岸到基隆河以北的角勢，攏有新石器時代大坌坑文化遺址，密密是的點我到今印象猶誠深刻。

奇蹟出現矣，著佇欲倚六點的時，山跤淡水佮蘆洲、擱過去的新北市的燈火漸漸變明顯，天頂的雲嘛破出一大空，金星出現，下性命放光，共阮表示長尾星嘛連鞭會出現，我知影這个時機可能袂維持誠久，馬上開始翕相，終其尾，如估計的，佇六點十分的暮光中翕著ATLAS。

雖然天擱青青抑未齊黯，尾溜已經真明顯，我開始設定快門線予伊作間隔(king-keh)翕相。翕一半才發現濕度誠懸，緊共加熱帶縛鏡頭(袂記了先縛，浪費一寡時間)。間隔翕相有一點愛注意的，著是佇設定時，兩張曝光之間歇的時間袂使設定傷長，無注意時間著會浪費。譬喻設若隔翕5秒著歇3秒，按呢真正用在曝光的時間干焦八分之五，一點鐘無四十分。

設定好開始自動翕，斡頭發現背後一片白茫茫，拄過月半的月華佇矮矮的空中勉強炤出人的黑影，黑影袂輸1仙皮尪仔，擱敢若teh 搬科幻電影，隨時會有外星人位霧中行出來的款。

七點外矣，雲擱略略仔teh 濟起來，檢采無偌久伊著會像萬馬聚集傱來，天星著會隨予崁起來，好運的是 e-hng暗的ATLAS 應該擱有3等，照昨昏佇大直的經驗看來，雖然天無蓋清，毋擱大約累積有十分鐘曝光尾溜就不止仔清晰。

最近電視佮網路頂為著這粒講是這幾年來上光的世紀長尾星誠鬧熱，連阮阿母嘛提醒我。媒體用「八萬年的約定」(華語) 來形容這擺ATLAS長尾星的出現。其實我對這種長週期(200年以上)的長尾星無彼種浪漫的感覺，在我看來彼只是欲製造話題的詼諧。因為仝一粒長週期長尾星汝一世人干焦會看著伊一擺，袂輸經過門口的生分人，無法度講什麼兩人的約束。再講，八萬年的週期實在傷長，八萬年以後人類敢擱佇地球?若是欲講約束，短週期的著較有影，譬如講有足濟粒木星族長尾星(週期20年以下)，he 著會使當作是老朋友，久久相招見一擺面，而且仝款也會作夥變老，因為伊每一擺接近太陽著會予太陽風吹落一寡物質。

我佇臆，佇無偌久的古早嘛無的確有人佮阮看過仝1粒木星族長尾星，譬如平埔族的年代，無這馬都市的光害，佇大屯山檢采有法度看見六、七等星，若按呢有可能像12P、46P這種這馬擱有5等的6年週期的，我看過的長尾星，若自古早時就來過，一定免用望眼鏡干焦目睭著看會著一球若棉仔或者蒲公英。

這馬眼底的台北夜景誠媠，電火五彩喧煬，使人僫想，遐捌是平埔族部落散插(suánn-tshap)、鹿仔四界lòng的闊莽莽的草埔。

攏同齊消失矣。科技進步了誠緊，逐項物件做了真四序，古時的草埔、樹林早著變成密密是的大樓、販厝、百貨商場佮工業廠房。

都市透眠袂禁的繁華夜景，佮一大片烏暗的平原中有幾點零星搖動敢若隨時會化(hua)的營火，叨一種景色佮媠? 我佇心內問家己，但是並無答案。

----

加映：

我捌拄過的十年一遇的大屯雲海。

-----

註：

[1]劉益昌的《芝山岩遺址與台北史前》這本册的資訊密度誠懸！作者一定用了相當大的氣力整理，除了詳細介紹芝山岩遺址過去到今的研究、發現以外，也用了將近一半的篇幅整理了台北其他重要遺址的發現。

這本册的特點除了對出土文物的介紹外，其中1个特點是佇對各別探坑的地層堆疊剖面的繪圖佮文字描寫相當斟酌，其中較新的探掘部分，對無仝文化層的塗的顏色的描寫使用了soil color index 數字的紀錄，讀者會使查表知影準確的顏色。最後作者依據以上的考古發現，論述台灣北部史前人類的活動佮文化發展，以史前史接紲，建立大台北完整的大歷史，也請讀者以土地的觀點出發，將史前史納入，做夥來重新建立台灣的大歷史敍事。