逐長尾星（一）大直篇

 

＊本篇為漢羅台文。 

一、計畫   二、大直橋之一    三、大直橋之二   四、美堤碼頭    

2024/10/29初稿

一、計劃

自舊年這粒長尾星予人發現而且估計今年上接近地球的時陣光度差不多會到2等甚至以上，不止仔光，自彼陣我著開始参考NASA JPL 計算的軌道佮光度的曲線，安排今年上適合翕這粒長尾星的日子。
因為已經有過去翕長尾星的經驗，按算 copy 頂1擺翕Neowise 的計劃，這兩粒的路徑佮光度差無偌濟，檢采尾溜的長度也差不多，若按呢至少一支鏡頭的焦長(tsiau tn̂g) 一定愛比116 mi-li（mm） 擱較短，因為頂遍用K3II 相機加 FA77鏡頭 (等於全幅相機的 116 mi-li) 翕 Neowise 時的尾溜長度已經超出相片的範圍，誠有可能 ATLAS(C/2023 A3 ,Tsuchinshan–ATLAS) 這粒亦仝款，所以這改拍算 FA31(等效 46 mi-li) 佮FA43(65mi-li) 鏡頭攏用會著，毋但翕地景加長尾星的固定曝光，亦愛負責用短曝累積成長時間的曝光的長尾星特寫。

2020年的 Neowise 長尾星

另外 1个原則著是長尾星接近日頭、較光的彼站仔（但是避開伊佇日頭邊仔、上光但嘛是受日頭光影響上嚴重彼幾工) 是以帶風景的長尾星景寫真為主，仝款選擇以大直佮草山為景，因為我個人自耍天文寫真以來著按算著愛佮自己生活的土地、有感情的所在作連結，無愛四界趖。
等到ATLAS 變黯至四、五等以下，彼陣伊離太陽的角度就誠大，若佇鞍部翕伊，伊的懸度己經夠翕半點鐘以上袂去予大屯山閘著，彼陣才用赤道儀載望眼鏡(500 mi-li) 來翕長尾星的頭節特寫。

（有關我過去佇草山翕長尾星的經驗，我舊年捌佇天文館演講分享過，我嘛有整理1篇文章囥佇我的 blog）

二、大直橋之一

10/13 

長尾星光度大約是1.9 等，離太陽的角度(S-O-T) 有18.7度。

大直橋。

下昏 6:24。

Pentax k3II+FA31

ATLAS 長尾星佮圓山仔飯店

長尾星  ATLAS 是位太陽的西爿接近、踅過，位伊的東爿離開，當當(tng-tong) 伊佇西爿偎近太陽時，伊會比日頭較早出來，若欲翕伊著愛佇半暝、日出進前去地平線附近無予遮閘的所在，因為伊出現無偌久連鞭著會消失佇貓霧仔光之中。

前站仔台北的天氣誠bai2 ，而且長尾星猶佇太陽西爿，看觀測條件比咱較好的國外翕的拍敨仔光內的 ATLAS佮 Neowise 外形差不多，就按呢我著誠貧惰為著翕ATLAS 專工半眠起床爬去山頂跋氣運。

這幾工伊已經踅來到日頭的東爿，開始會出現佇西方的暮色當中，綴日頭尻川後落山，角度一工懸過一工，免半眠爬去山頂抑是海墘剾風矣。

今仔天氣有較好淡薄仔，雖罔雲嘛是袂少，毋擱參 Neowise 差不多光度的這種大粒長尾星，因為有夠光，只要無落雨，雲有閬縫，wan-na 有機會看/翕著伊的身影，所以過晝欲倚五點進前我著攢好相機佮三跤馬，慢慢行到大直橋頂，tshāi 好相機等日頭落山，看彩霞順紲罔等長尾星。

自舊年老早我著先查好星圖，確定 ATLAS落山的經度/位置佮日頭差不多，所以位大直橋頂向西爿相過去是我計劃欲翕个長尾星風景之一--黃昏中的 ATLAS 佮圓山仔飯店--的所在，因為佇大直橋頂中央有誠好的視野，尤其西爿，概約仔2度以上攏袂去予閘著。這是平常時我散步去大直橋看夕陽，或者去駁岸邊走標所得著的經驗。

日頭當欲藏入西爿的地平時速度不止仔緊，天頂雲尪的色緻嘛綴-le 變化，位黄色轉柑仔色，日頭消失後天邊雲彩連鞭著紅貢貢，袂輪調色盤頂有人一直摻入色料擱 huê-來 huê-去。北爿雲已經散一半，現出紺色的天，看會著長尾星的希望真懸，只要天公伯仔鬥相共，予南爿的雲尪莫(mài) 擱倚來。

好佳哉，雲尪無振動，佇按算翕長尾星會現身的時陣(日頭佇地平以下差不多有十度的時陣)，伊所在的天區無雲，這時天頂先現出兩粒星，金星佇伊的南爿，大角佇北爿，當好作參考，ATLAS 著佇 in 2粒星的中間、較低的位置，用相機真簡單著翕著伊，紲落去我著切去自動快門予伊加翕幾張。離我幾步的所在有人攑長鏡頭嘛欲翕長尾星，毋擱伊个app 一直指示伊向大角星彼爿揣，伊煞一直揣無，我便予彼知影我相機的方向，終其尾伊嘛順利翕著。

欲轉去厝的時我順紲到市場口的米粉攤，吃米粉湯配1盤青菜佮1塊(tè) 豆乾糋，吃袂siān 的好滋味因為頭拄仔有翕著長尾星感覺愈芳。

三、大直橋之二

*10/14 

長尾星 2.1~2.5等(S-O-T 23.3度）

大直橋

PM 6:11 

Pentax K3II+FA43

我徛佇橋頂，擱無偌久日頭著欲落海矣，橋邊我的母校，大直國中五點下課的鐘聲拄響起，我誠愛聽阮母校的鐘聲音樂，彼是Dvořák 的〈新世界交響曲〉第二樂章的 1段旋律（一般人較知影是〈Going Home〉這首歌，著是伊e美國學生William Arms Fisher 提彼段旋律來寫e歌。華語嘛有李抱忱添詞作〈念故鄉〉)，這个旋律引起我一種莫名的思慕，佮微微哀愁的感覺，尤其是佇黃昏中聽著這首歌，更加使我感動。學生攏Going home矣，下班e人嘛當欲Going home，橋頂人來來去去，黃昏時衆生攏佇欲轉去厝或者是岫的路途中，若是没法度轉厝的，這時看著夕陽著會有思鄉的甜蜜佮哀愁。毋知Dvořák 譜這段旋律的時心裡想的是啥物咧?

我將三跤馬展開，位揹仔內提出相機組好等待，今仔天氣比昨昏略仔較䆀，毋擱夕陽猶是穿過雲尪，霞光 1逝 1逝敢若紗紡的 ，又親像用葛粉做的粿仔條，喔，擱有搵一寡仔黑糖蜜。地平上三度至四度的懸度有 1逝不止仔厚的黑雲，日頭漸漸沕入敢若空手道黑帶的雲中，連鞭又擱位伊下面探頭出來，1粒絳絳紅的紅柿。

這時自機場彼向有一位看款是女學生下課騎自輾(tián)車紮相機 phiann來，嘛是欲來翕長尾星的，另外附近有一位女士嘛是仝款目的，相借問，女士才發現家己䢢拄䢢是女學生的學姊，真心適。

日頭已經落海啊，較懸的所在烏雲 1tah、1tah 密密是，只有破 1空目睭遐大，看款愛閬早開始翕，上好是佇伊開始現身的時（背景的暮光比伊暗的時) 著共掠著。金星先出現矣，毋擱若 teh 和阮奕覕相揣，一目-nih-仔 就擱覕入雲尪後，inn-暗的 ATLAS 會佇金星的正手爿(北爿)，大約是 20度的位置，只要用標準鏡頭(50 mi-li 彼跤兜) 將金星囥佇 liveview 的左手爿邊仔，長尾星著自然佇構圖內。快門若揤天色若暗，果然，天公伯仔替阮開彼扇目睭大的窗仔有鬥相共，無偌久長尾星的頭(nucleus+coma)就先現身，佇影像內若1粒2等外的明星，紲落來掃帚尾嘛出現，即馬佇 liveview 就看會著矣，我報 in 兩位看，教彼位提變焦鏡頭的女學生愛先將焦長轉去50 mi-li跤兜較袂僫揣，我並毋知彼有翕著無，毋擱我臆等彼轉去厝斟酌逐張相片共檢查，應該有百分之九十的機會揣有。女士問我猶有偌濟時間長尾星才會落海，隨走轉去欲提翕三跤馬。可惜無偌久，長尾星沉入烏雲了後著無擱再出現矣，據在人敢若孝呆硞硞等。好佳哉我今仔日翕了早。

無連鞭收拾器材，我繼續踮遐吹風、看風景。橋頂騎腳踏車欲去二爿河濱公園的人來來去去，有辛苦1工拄仔才下班的，逐家的面容雖然有淡薄仔疲勞，毋擱佇暮色中攏是紅牙紅牙，遠(hn̄g)遠留一簇殕色喙鬚的彼位兄哥（我捷捷佇街仔路看著伊）又擱攄伊彼台頂仔回收的紙箱仔疊到懸懸懸的捒車，自橋頭沓沓仔攄起來橋頂。看我佇翕相，伊著過來開始共我開講，位大直橋的風景講到大湖公園伊發現的1个誠讚的攝點，聽我講我是學機械的，伊著講當初伊做工時技術有若好，按怎去予人欠工錢，又講到路邊的草藥仔愛按怎種，講建設公司按怎欶血、河濱公園的走標活動按怎是詐欺、伊少年無電火時按怎憑伊的智慧𤆬一陣囡仔佇天烏落來的時落山⋯⋯，伊敢若有講袂完的故事，是誠愛講古、心適的先輩。

四、美堤碼頭

**10/17  

長尾星 3 等，(S-O-T 35度)

美堤碼頭公園。

景1 PM6:50 Pentax k3II+FA43

景2 PM7:21 Pentax k3II+FA77

 1隻小船停踮港墘，袂輸返岫歇睏的飛鳥，較遠所在的斜張橋 、圓山仔飯店的電火攏猶未點-to̍h，黃昏將基隆河染到天地歸片柑仔色，徛佇駁岸頂的人佮其他萬物(bu̍t) 是1塊罩到足kē(低)的畫布頂面幾撇烏墨，時間佇遮堅凍。

這一霎仔久爾的景緻，是1工內上有魔力的時間，現此時，攑頭浸沫(bī)佇黄昏的各樣人的心情佮思想攏透濫佇這个氣氛當中。

今仔天氣比前幾工好誠濟，我早就按算好下昏欲來翕第二景--美堤碼頭佮大直橋頂懸的長尾星。倚晝我就先騎車到16號水門外的美堤公園揣適合的點(會當直接騎入來，兩爿攏有停車塲)，本來拍算共歸位碼頭攏囥入去構圖，毋擱按哪碼頭會佔去傷大的範圍，傷搶戲，變「乞食趕廟公」，而且畫面嘛會變誠齷齪，所以我改選較頭前的所在，拄好有1隻小船會當作前景(希望黄昏的時伊擱佇咧)。因為已經知影 ATLAS 雖然無 Neowise 遐有肉擱有明顯的紺色離子尾溜遐媠，但是 ATALS 的尾溜不止仔長擱光，所以用標準鏡頭紲落來翕的地景攏愛至少用6張來接才有夠共歸粒長尾星囥入來。另外也按算若時間有夠，嘛欲使用較長的鏡頭(FA77) 翕大直橋佮彩燈的水影。 

決定好翕相的點了後，我就佇公園四界散步，這个基隆河邊公園，佔地闊，四箍圍仔攏是會當坐佇塗跤 picnic 的草埔，工人當 teh 拍草兼種鼠尾草（tshí-bué-tsháu），鼠尾草古錐仔古錐，佇本來干焦大片青色e風景上添1簇桔梗(kiat-kíng)色，好比是點描畫派的手路。可惜公園樹仔無幾欉，若佇日頭當炎的時來無稍遮一下，連鞭著會予曝 kah(到) 頭眩目暗。

佇這公園凊彩1搭攏會使看著一空一大樓，誠適合全家或者朋友相招看新曆年煙火。較䆀才的是，基隆河的氣味略仔歹嚊。

都市人為了欲防止淹大水，毋知位何時開始的，煞將河川看成干焦有危害的野獸，khōng 十公尺懸的堤防將人佮河川隔開成2个世界，蹛佇堤防內的人漸漸袂記了河、毋管伊，干焦佇欲偷倒糞埽、廢水才會想著伊，伊煞漸漸變臭。

都市發展佮親近河川其實有法度兩全其美，我個人就感覺日本的兩面有斜度的超級堤防(Super embankments) 是會使參考e做法，進前我讀過隈研吾佮陣內秀信編的册《廣場》內面拄好有介紹著隅田川 Terrace ，he 著是以超級堤防來營造親水的入口佮堤防內面市街發展的一體環境，Super 堤防內的建築基地先用土疊懸到佮堤防仝懸，然後才寬寬仔向市區1坎1坎斜落，河邊的建設就起踮這片疊懸的基地上。

我 teh 想，基隆河右岸遮若换作是 super堤防，來河邊活動e人應該會比這馬較濟幾偌倍，論真講來，古早時代，不管是臺灣抑日本，河面佮河邊不時嘛鬧熱滾滾，誠濟人靠伊佇生活，佇河川邊、橋頭活動。美堤遮罕罕仔才看會著有遊船佇河頂行，寬寬仔駛去圓山仔彼爿擱踅轉來，孤孤單單，袂輸佇悼念過去河上的繁華。

遮的船仔大部分的日子攏歇佇碼頭(嘛有拖起來邊仔的草埔仔囥)，一半擺仔才予風吹的水泱小幌振動。

現此時，我所徛的位置頭前無偌遠的駁岸邊停著有1隻小船，自早到這馬安安靜靜，黃昏中袂輸返岫歇睏的飛鳥，成作畫布頂的 1簇烏墨。

駁岸邊誠濟人佇翕黃昏的美景，我亦無例外。因為天色佮地景的反差誠大，所以我加翕幾張無仝曝光時間的影像，通攢轉去做HDR處理。而且因為我用 65 mi-li 鏡頭，嘛要分做幾偌區翕才有法度轉去接出完整的大景。

大景無言，黄昏更加使人多愁善感，伊的媠引人感受著古國詩人的「夕陽(si̍k-iông )無限好，只是近黃昏」的毋甘，這个風景一目-nih 就欲消失矣，烏墨連鞭著會占贏柑仔色。

毋擱e-hng 有小可仔無仝，我美麗的心情會佇烏夜中延續，著佮過去彼寡觀星的日子仝款，因為稍等一下眼前的風景著會加1粒長尾星，佇大直橋頂懸無幾偌度的天庭。翕相的時有1位紮GoPro 的 先生 (名叫作 Freeman) 行來相借問，嘛是欲揣長尾星，我共解釋佇市內干焦用目睭並無法度看見ATLAS ，利用金星做參考來翕伊上簡單。

西爿一直有雲，好佳哉雲尪懸度干焦差不多到大直橋頂所以袂影響著。六點外，金星出現，誠緊我著佇伊正手邊頂無偌遠的所在揣著ATLAS，開始無閒翕相。

Pentax K3II +FA43

翕欲一半的時才發現無做遮光的準備有影響（後擺愛斟酌），日時來揣點的時無注意著邊仔有一葩路燈，佳哉因為伊電火球仔光線較暗，所以佇影像處理的時家己做一張平場影像加減會使將伊的光芒減掉。

Freeman 後來翕完著趕欲轉去無閒厝內事矣，我則（tsik）是徒去較頭前的駁岸繼續翕大直橋的光影。

按算的工課翕完，窮好家私，斡頭欲轉去的時，碼頭有零星的LED彩燈，1陣人佇遐開講、tsi̍p-一下，行過碼頭邊大埕，有1台誠奅的跑車停 teh，邊仔無偌遠，有人坐佇家己紮的䖙椅頂看夜景，雖罔對面嘛有十公尺懸的 khōng-ku-lí 堤防，除了高架橋，差不多干焦看會著一空一大樓，啊，這一絲絲仔的奢華夜景，總是愛學會曉自得其樂，享受夜風微微，不止仔悠哉。

加映：最近大直橋的晚霞