春天的星系漫遊 II

3/23

今仔天氣uan-na 袂䆀。

昨天看氣象報寫講這站仔的好天可能到拜三才會變天，著決定安排觀星一工休睏一工，按呢拜五、今仔佮下禮拜二攏總會當上山看星三暗擱袂忝。

下昏暗的計劃是先趁暗頭仔獵戶座猶未落山進前好好欣賞M42星雲彼隻火鳥，紲落去才擱繼續星系漫遊。

到鞍部時看著小觀音山電視台彼葩刺目的大燈擱tōh著--ê，彼葩燈火是幾年前才有的，伊佮運動埕的金鹵灯抑是魚船的集魚灯光度欲仝仔欲仝，所以若tōh著--ê會變成東北爿的光害。好咧佳哉伊毋是逐暗開，曷若有光的日子通常欲倚九點彼跤兜仔，上加是翻點前就會關掉，罕得著歸暝。

現此時獵戶座佇西爿，所以小觀音山彼葩電火袂有啥影響。先用低倍率的60倍觀察M42 星雲，無加濾鏡時火鳥中心四合星的四箍圍仔的星雲就誠顯目，毋擱加濾鏡了後連翼股的頭前沿嘛看會著，而且四合星附近的雲氣的光度並無啥變暗，會使推論遮的光線主要是OIII的螢光。

紲落來換百二倍來觀察，這時四合星東北邊有一節真突出的部份，暗眠摸啥物攏無，彼是一節敢若竹筍的暗星雲，佮伊成強烈對比的四周圍發光的雲氣分明有無仝光度的區域，誠成山田，其中東南爿有一逝誠直、又明顯的落坎分界，向這片四方仔四方的雲氣南爿巡去，過四合星了後裂開一條敢若田溝的暗帶。拍鐵趁燒，換二百四十倍懸倍來看，感覺又變完全無仝，雲氣現出紋理，袂輸蟬仔經絲，擱成棉絲仔糖，立體若在眼前。

看煞M42，翻頭看小觀音山彼葩電火毋知啥物時陣已經熄去，九點捅，石頭的oo-tóo-bái嘛到停車場矣。我將望眼鏡轉向北斗七星，準備繼續星系的漫遊。

先位離天樞星大約10度的M81佮M82，現此時拄好佇正北爿。今暝的透明度無拜五好，感覺夜空有一沿薄縭絲的水氣，毋擱欲看著這2个星系無問題，佇XW40目鏡、60倍的視野內拄好會使同時看著in，其中較小的彼粒是M42，看起來略仔成扁豆仔，伊的中央有淡薄仔缺角，東爿較光，毋擱光度無講蓋平均。M82加大箍誠濟，但是透明度無好的情況下干焦星系中心明顯。

接續落去想欲看佇頭鬃座的針(Needle)星系 NGC 4565，肉眼(jio̍k-gán)就看會著的Melotte 111疏散星團--量其約佇獅仔座尾溜的β 星(β Leo)佮獵狗座的α星(α CVn)中間--東爿1度捅的跤兜仔，不止仔好揣。

調整望眼鏡踅到Melotte 111之後，一面注視XW40目鏡內的視野一面調整望遠鏡向東，行無偌遠會先看著NGC 4494，一粒橢圓星系，星系仁誠光，踮遮先歇一个，素描畫好了後繼續向東，當當(tng-tong) NGC 4494 徒出目鏡視野時針星系拄拄好位另一爿徒入來。

因為這个星系向對咱的拄仔好是伊的邊仔面，星系盤看起來才會扁扁像一支針，講罔講，不而過第一眼先看著的是圓輾輾的星系仁，等繩一睏仔加上用Rocking 技術(用手動略略仔來回徒振動視野)，才看出幼幼的針，實在講較成穿䢛過一粒珠仔的針。

擱來想欲看的嘛是有稍寡趣味的星系--一隻海翁 (NGC 4631)，佇針星系的北爿量其約7度的跤兜，現此時欲倚頭殼頂，佳哉用找星鏡免幾步著行到位，頷頸仔無去跩(tsuāinn)著。像欲看頭殼頂的目標的這種情況時，若有goto功能自動幫你徒望遠鏡去對準目標的自動化赤道儀著真方便，毋擱家己手動揣星有一種原始的魅力佮趣味，對逐个天體之閒的相對位置嘛會有較深的認捌，我個人是誠愛耍手動。

海翁真大隻，頭尖尖，尾溜瘦抽、自由自在，佇烏暗、寧靜的宇宙深海拍滂泅，身軀殕殕若是黑夜中的貓霧仔光。

講著自動化，下昏暗除了石頭，另外擱有兩位熟似的星友，in 攏有智慧望遠鏡，現此時停車場除了有S50，擱有 eVscope 2 佮CELESTRON Origin，根本是智慧望遠鏡展示場(笑)。

翻點矣，其他星友因為隔轉工愛上班所以攏佇收拾家私準備下山。

不而過我又擱毋甘心，夜當咧媠，1點進前聽好擱看一个M13球狀星團。

武仙座已經昇起來矣。