《台語現代小說選》

假使你（汝）的母語是台語，個人強力推薦您讀只本台語小說選集。哪你的母語是台語而且你對台語文學嘛有興趣，按呢著更加應該來讀只本冊。

編者已經將只（這）本冊裡面收的台語小說攏總轉成漢字（用教育部公布的台語常用詞彙作標準），一寡仔揣無字的才以羅馬字寫（白話字）。有的頁面下跤有用國語寫的解釋，彼个標音是用白話字。

無論是欣賞、觀摩抑是學習，我相信只本小說攏會使予你耳目一新，尤其哪是您進前毋捌接觸過台文小說，按呢這本應該會改變你的三觀，讀了你著會了解原來台語小說已經會當寫到遐爾夠分阿。

只本册有5篇是1930年前，也就是日治時期的作品，這幾篇的目的性較強，有傳教的譬如〈拯救〉（郭頂順），有描寫日本殖民時期的不公不義佮譀古，蔡秋桐的〈連座〉著是致重只點，有宣傳左派思想的譬如蘇德的〈與其自殺，不如殺敵〉，一篇是楊逵的〈剁柴囡仔〉，彼个是描寫社會底層人的悲劇，閣有賴和的〈一个同志的批信〉，則是用摳洗的手法來描寫社會運動的硬篤。

佇這个時期的漢字台文書寫猶在bo̍k-bo̍k泅的期間，用字閣足濟訓讀、倚音，句法嘛受著北京話/國語的影響，所以讀起來有不小虐嘴，編輯的呂美親在册的話頭開了欲倚二十頁說明這个時期台文漢字的屈文就意，離言文一致抑閣有一段距離。雖然那用白話字會當正確的以表音來寫，不而過這種規篇以羅馬字來寫的，讀的人如果沒學習過白話字閣足上手的，基本上是無法度讀的，不親像漢字普通人只要有小學的漢文程度差不多著會使讀到三、五成。

這寡仔日本時期的台文創作，漢字書寫抑沒一致的共識以外，因為政治佮社會環境的因素，早期的小說（没干單是台文）書寫的內容多限制閣誠濟。毋閣毋管文字抑未夠熟水，佇楊逵佮賴和的只兩篇文章可以明顯看出佮頭前三篇風格完全没仝，另外抑有一個特點，彼就是in 沒硬囥入去振奮人心的結局，in的文字更加有文學性。

只本書的後面攏是1990年代後的作品，其中有王貞文的〈自由時代〉佮胡民祥的〈簽證〉是以海外的台灣建國運動的角色的眼光為觀點所發展出來的故事，描寫國民黨的黨國統治時陣這寡黨外運動受著監視佮迫害的情形，這兩篇會使講是反抗的文學書寫。

另外有描寫大家新婦、家庭問題的作品譬如藍春瑞的〈奪人的愛〉或者是林美麗的〈八卦紅之心〉，攏以全知者的描寫的方式，不而過我個人會當發覺角色對白中有偷偷代替作者tī-leh講理的「雙聲」話語，有明顯說教的影跡。

哪是王羅蜜多的〈地獄谷〉，彼是以笑詼的手法去寫一個議長選舉的賄選過程，透入北投特別的地理風俗。

續落來幾篇是我個人尚愛的，首先是陳明仁的〈詩人的戀愛古〉，遮可能是台語的後現代小說的性別書寫的經典，毋是我膨風，個人認為只篇比華語小說《遣悲懷》(駱以君)頂懸對“性”的描寫閣較自然、熟手。

另外，陳雷（毋是彼个唱歌的陳雷）的彼篇〈鄉史補記〉是帶著淡薄仔魔幻的鄉野傳說，以野史的形式來講一个佮狗吃人有關係的傳說，表面雖然講是狗吃人的傳說，抑毋閣伊嘛是描寫早期台灣的社會文化。

閣來，胡長松的〈金色島嶼之歌〉是借用1636年荷蘭的東印度公司屠殺拉美島住民（小琉球事件）的事件做背景去創作的小說，我愛裡面伊紲拍的文字。

尚後尾是陳正雄的〈命〉，伊是以鬼神佮算命等等民俗作基礎的傳奇故事，以上三篇會使歸入宋澤萊所講的西拉雅書寫，廣義來講是平埔族書寫，其中嘛有重建得欲拋荒的台灣早期的文化的企圖。

哪讀完只本小說您應該也會發覺，其實用頂真的漢字來寫台語並袂像咱一般想的遐爾困難，假使你已經有淡薄仔了解漢字的結構（六書），甚至對拼音的規律（即聲韻、切音規則）有小寡仔概念，按呢來讀只本書的文章基本上應該至少攏會當掌握六、七成以上。

比較可能有阻礙的所在是讀的人的台語語感毋知偆若濟，如果你平常時佮厝內人抑是厝邊隔壁毋是講台語，按呢你辨（捌）的單字彙可能較少，只時除了平常時愛捷講以外，讀册（譬如讀只本）是較緊增加詞彙的方法，個人建議會使哪讀哪寫筆記。

我嘛建議以只本小說作基礎，揣出你較甲意、順眼的作品，然後去册局揣只寡作家寫的台語冊來讀。

＊＊＊

*本篇羅馬字使用教羅（教會羅馬字），又稱白話字

*個人用漢字僅是自己習慣，並沒有完全依照教育部字彙校正過。如果你想要查詢教育部的詞彙請參考：

教育部臺灣閩南語常用詞辭典