秋夜觀星（1）

 秋夜觀星(tshinn) 

(1)

8/31

看氣象預報，雖罔meteblue 表示 ehng-暗(下昏暗) 鞍部會有薄薄ê低雲，不而過根據過去十幾冬佇頂仔觀星ê經驗，秋冬ê季節，若彼个雲懸度ê預報圖共雲層繪佇差不多700至1000公尺ê跤兜(彼个圖ê格仔真粗)（鞍部海拔828公尺），著有誠大ê機會到時陣會沉落去800公尺以下，因為鞍部ê海拔是828公尺，所以頂頭天清星彩ê機率誠懸。

下晡，攑頭望向草山方向，除了有1寡仔雲猶袂散，天氣大概仔袂䆀。開始順序準備觀星ê器材，因為攏已經模組化，所以真緊著攢好勢。共 ehng-晚 欲使用ê望遠鏡Takahashi FC-76收入攜行皮箱，將赤道儀 Pentax MS-3 本體佮配重先囥入去機車後斗，紲落位電子防潮箱內揀幾粒適合ê目鏡到塑膠盒仔內。

猶擱有，頭燈愛紮會使切去紅光ê(因為紅光是佇黑暗中較袂刺激眼睛ê波長，黑暗中人ê目睭對這个波段較無敏感)，若人ê目睭去予強光刺激到，欲擱再恢復到會當在佇黑暗中看見上暗ê目標ê能力，著擱等二、三十分鐘矣(這个習慣黑暗ê過程叫作人眼 ê dark adaptation )。

最後，為著in 暗計劃欲看ê，佇翻點前後佇天頂附近ê天鵝座目標，我挑工佇出門前擱在FC-76 ê 遮光罩仔頂戮空 thap-牙，共QuickFinder 星器鎖起哩。擱加上我進前買ê，保護跤頭趺 ê 厚ê墊仔加持，按呢我著可以揣天頂ê目標袂去tsuāinn 著頷頸脖，跪咧虔誠瞻仰（笑）。

拄到鞍部ê時，高空ê雲層猶未散了，我代先對好極軸，據在赤道儀家己佇遐紡，先來泡一碗泡糜食看覓，我第一擺食這種佮泡麵相像，會使直接用滾水泡ê糜，啖一喙感覺誠讚（後改我欲買豬骨口味ê紮來）。

大約仔是九點時，雲攏散矣，夜空诚清氣，透明度佮視寧度攏袂䆀，嘿!今夜無月娘來插花仔。

因為星況所賜，我雖罔干焦使用7.6 cent ê 細支折射鏡，佮LP2(OIII+Hb)濾鏡鬥搭眼視觀測，嘛完全無困難ê辨識出幾个我過去捌認為著愛用10 cent 以上ê口徑才會當佇遮此（鞍部，光污染等級Bortle 5）看會著ê星雲。

啞鈴（à-lêng）星雲(M27)是我第一改使用FC-76 來觀察伊，它誠光，用60倍時完全免用著濾鏡就看會出來。伊ê大小（直徑）大約有3光年，離咱地球有1400光年。用目睭看煞、素描繪好，我嘛用手機仔轉接去目鏡頂面，用10秒翕出啞鈴星雲ê美麗身影。

頂回觀測過ê環狀星雲(M57，嘛號作手指星雲)也是離地球差不多欲1400光年，但是伊ê直徑著加細真濟，量其約干焦0.6光年，所以目睭欲觀察著愛使用較懸ê倍率，才較好欣賞。

話擱講轉來，0.6光年嘛毋是偌短ê距離。

咱ê太陽系上遠ê行星--海王星，伊離太陽大約 30AU (AU --天文單位，1个天文單位著是地球到太陽ê距離，一光年大約是63240AU! )，嘛干焦是 0.000474光年!(位地球出發ê光大約行四點鐘久ê距離），毋擱若 mai 用光來算咧?1979年美國捌發射二台航海家無載人ê太空探測船，其中一台有飛經過海王星附近，he 已經是1989年矣，足足飛了十年！

海王星kan 足遠(hn̄g)--e? 無喏!伊猶無算是佇咱太陽系ê邊界。有1種講法，著愛算到太陽ê引力影響ê範圍--Roche 球ê直徑，佇遐不是空空無物件，不管時會有長週期彗星來到地球ê彼个源頭--Oort 雲著是佇彼遐遠 ê 位置，袂輸1粒厚肉空心ê蒲桃包圍咱--太陽佮伊ê 8大行星--彼个範圍比起伊干焦1粒砂ê大细。若講是彼搭，離太陽已經是2光年矣。

講到長週期彗星，我定定咧空思夢想，是講既然不管時in 攏按四界飛接近太陽，又擱向四界飛離開，其中若是走雙曲線(hyperbola) ê 軌道--ê，in 著會飛出太陽系、飛入星際空間，照按呢想，咱敢無法度佇伊欲離開ê時候共「點油做記號」，發射會當代表咱 人類佮咱地球ê紀念品，像航海家紮ê金刻盤，內面有咱地球上各種人、生物、自然佮人造物ê影像佮聲音，囥起彼粒彗星頂，予彗星代替太空船載彼个珍貴ê記錄去銀河系ê各個所在咧，無的確總有1工其中一隻會去予(若準有)外星智慧生命發現，予in 知影in 並毋是佇闊閬閬ê宇宙中唯一ê智慧生命，in 並毋是孤單--ê。

猶毋擱離太陽上近ê恆星-比鄰星離地球嘛有4光年！若準以航海家ê速度飛去比鄰星，大約嘛愛8萬年才會到位！

講到外星探測，若是人類家己欲坐太空船飛出去太陽系，彼是阿婆仔生囝--擱真拼，無定著猶未到彼工咱地球早著石頭爛海水焦矣，但是若干焦欲飛去火星殖民，我想咱後一代一定看會著，實際上，spaceX 講擱兩年無載人starship 著會試驗飛去火星佮佇火星降落，若一切順利，十年內著會載人過去，二十年著欲建立火星都市。

毋擱我e腦海中已經浮現1个畫面，1陣位地球出發前往比鄰星ê殖民船隊，佇闊莽莽ê星際空間快速飛行，但是對比背景遙遠ê星，in 猶是敢若一陣龜沓沓仔爬進前。

我佮望眼鏡踅去揣手指星雲來看，量其約共算，手指星雲ê直徑大約是地球到海王星距離 ê 1625倍！假使以航海家號e速度航行，著大約愛1萬6千外年才會當穿過手指星雲。

手指星雲ê外形誠特殊，嘛有人叫伊作甜箍仔(華語號作「甜甜圈」)，會生作按呢是因為行星狀星雲(planetary nebluela)中央是1粒已經是佇恆星ê演化ê尾聲，真高溫ê白矮星，它的溫度會使超過20萬度！所以將伊四箍圍仔ê雲氣攏電離矣（變成電漿），這寡電離ê電子會擱再佮離子重新結合(recombination)而且降到較低ê能階，這个過程釋放ê能量著會以特定ê波長ê光子射出，咱位望眼鏡眼視時看著ê是其中較強ê波長。仝時陣四周圍電離ê雲氣嘛去予中央ê白矮星ê恆星風吹向外面，敢若歕雞胿仔，最後著變成這馬咱看著伊ê模樣。

欲倚翻點，來自台北市ê光污染減輕了誠濟，夜空明顯較暗矣，這是郊山ê夜空光度變化ê特殊性，主要是綴都市ê生活作息變化，若空氣ê透明度好ê時，這時鞍部南爿樹仔尾ê星也看會得著，這時陣天頂ê表面亮度（Sky surface brightness）大約會到20。位這時開始一直到曙光前是上好ê觀測時段。

十二點矣，天球南爿ê螺旋星雲 （NGC 7293 Helix ）也拄好升到子午線附近，正是上好ê觀測window (華文翻作「觀測窗口」)，紲落來我便共望眼踅向南爿，對照星圖徒到星雲邊仔ê參考星，疊起濾鏡了後螺旋星雲也清楚現現1球（當然，干焦看到ê是過濾過ê OIII+Hb 波段，並無Ha 彼輪）位目鏡內浮出來。

螺旋星雲佮指環星雲生了不止仔像，毋擱螺旋星雲離咱ê太陽系近足濟，（干焦）700外光年，是離咱上近ê行星狀星雲。

螺旋星雲ê直徑大約是2.5至3光年，大約就是位地球到Oort 雲ê距離。螺旋星雲ê年歲差不多有1萬年了，因為伊一直咧湠開，所以會愈來愈黯，可能擱再經過幾偌千年至萬年咱就看不著伊矣（到時人類這款生物敢擱佇咧?）。

佇欣賞螺旋星雲後，我換去看面紗星雲 。佇使用牽星法(star hopping) 揣面紗ê過程中我經過天鵝座佮伊龍爿ê翼股頂幾組雙星，佇望眼鏡中（無加濾鏡）一柑仔色帶一青色，雙雙對對誠媠。

面紗星雲是數千年前ê 1粒超新星爆炸後向四界衝出去ê外殼層、衝擊波佮星際物質ê 作用所生成，歸个星雲有45光年遐大！所以雖罔伊離咱大約有1500~2600光年遐遠，東面紗星雲佇低倍數ê目鏡內看起來猶是相當大。這是我第二改使用FC-76 觀賞伊，看起來若像一條鳥鼠仔色ê茄(若用10公分以上ê鏡看起來著無仝，會看著一爿有竹篙叉)，啊若是西面紗著暗誠濟，猶原干焦會使看著Cyg 52亮星邊仔ê 彼痕，若有若無。

像東面紗這類面積較大e星雲用焦長2 cent (20mm) ê 目鏡、30倍（倍率=望眼鏡焦長÷目鏡焦長=600÷20=30倍）來觀賞拄拄仔好。

ehng-晚我主要紮了Takahashi ê LE30，Pentax ê XW20, XW10, XW5，XW3.5，以及telvue ê 3-6mm攏總6粒目鏡。

出門觀測應該愛紮叨幾粒目鏡嘛是1門學問，因為全紮出來會 重-khuâinn-khuâinn 嘛無必要，而且紮著無適合 ê 等於無紮。遮有1个參考ê原則，若是目標是星雲這種暗天體，著是 exit pupil 愛佇 0.45mm 佮 7mm中間。exit pupil 是入去望眼鏡ê光線經過目鏡射出來ê光束直徑(華文翻作「出瞳徑」，exit pupil=望眼鏡口徑÷使用ê倍率) ，少年人瞳孔瞪上大蕊ê時大約是7mm，所以exit pupil 比這較大是浪費光線;另外1方面，若exit pupil 若傷細目標著有可能傷暗看袂出來(無仝人會有小寡差別)。以這个原則來選擇配合FC-76望胞鏡(口徑76mm，焦長600mm)ê適合倍率是佇76÷7=11倍 佮76÷0.45=168倍 中間，以這2个倍率去計算出適合ê目鏡焦長ê範圍。(另外我擱有準備1粒 telvue ê 3-6mm zoom，配合FC-76 上懸是200倍，雖罔超過這个範圍，但是這粒主要是欲提來觀察木星等等特別光ê目標。

這馬點外矣，山跤城市內大部份ê人應該攏已經進入夢鄉，睏到毋知人矣，不而過草山猶是有足濟「暗光鳥」，我毋是講夜遊、看夜景抑是較車ê人，我是講蟲豸動物。這時ê鞍部除了四箍輾轉草埔、樹林仔內蟋蟀仔佮四跤仔ê合唱以外，較遠所在傳來ê黃嘴角鴞(kak-hio̍h)規律ê輕亮幽揚ê喉韻，一半擺仔也聽著領角鴞對星夜ê贊歌。這寡夜ê聲音是佇遮觀星時不管時就會聽見ê美妙仙樂，若斟酌共聽，擱不止仔鬧熱，雖罔1个人觀星，也袂孤單嘿。 

2024/09/14  初稿

PS.一寡數字閣愛 check