熱人的暗暝/ 使用 goto赤道儀的 memo

7/1

(初稿)

一般咱講的goto功能就是會當自動瞄準目標天體的功能。進一步講，著是佇赤道儀抑是經緯儀的控制器頂面選擇目標編號或者打入座標，抑是透過手機仔或者電腦的星圖，踮星圖頂面點選目標，機器就會家己將望眼鏡踅去對準目標。有這種功能就會加方便誠濟。

雖然家己手動揣星較心適、較有觀星的'Fu'，不而過若拄著目標拄拄好佇頭頂的位置，使用折射鏡的目鏡佮揣星鏡時腰著愛向足低（定定愛跪咧），頷頸仔嘛愛跩到強欲láu（扭）著，無好紡。

擱再講，若是翕相的場合，用goto會使減省真濟瞄準目標的時間。

落黄酸雨的六月過矣，今仔七月的頭一日，天氣馬上變誠好，

天一黯，紮著我最近收的二手的goto 赤道儀(iOptron GEM28)，oo-tóo-bái 騎咧就拚起來鞍部歇涼。

Gem28的光學極軸望眼鏡顯示子午星(北極星)的方式佮Sky-watcher牌子相像，是採用時鐘的12點鐘線格。赤道儀的控制器會顯示即霎（tia̍p）使用者應該愛將北極星對準佗一格，極軸才會是對準正北極。這个坎站只是

普略仔對準爾，不而過若是攏有照步來，觀測地佮時間有設定正確，三腳馬的水平也有先tshiâu予正，赤經軸踅到零點位置(重錘杆指向塗跤)，按呢用極軸望眼鏡對的極軸精度著有夠眼視觀察使用。

毋擱因為下昏暗我欲翕相，所以紲落去我擱用MGENII來做漂移法進一步修正，調整到精差佇5'以內。

因為頭先對極軸做了有功夫，紲落連手機仔，做二擺的goto 和Align 了後，goto 已經設定了誠準。目標攏會佇相機放大十倍的liveview抑是高倍目鏡的正中央。

雖然有小可仔受著風的影響，毋擱我亦是翕了 Lagoon (M8) 礁(tsiau)湖, Dumbbell (M27) 啞鈴（à-lîng）, M57(Ring) 手指, PAC Man(NGC-281) 食豆仔人等等的星雲，調整導星的參數。

下昏暗透明度誠好，半眠用SQM量天頂的暗度來到20.2，天頂一逝南北向的白白的銀河嶄然仔明顯，遐是離咱(量其約)有二萬光年遠的，上億天星聚集形成的白帶仔，咱的目珠無法度分別內底的孤粒星，伊像一條牛奶河，也親像薄離絲的絲仔或者蠓罩。

赤道儀佇自動翕相的像時(siāng-sî)，我另外提出K3II 相機，使用伊的ASTROTRACER來翕銀河，十外年來頭一擺將曝光時間設到5分鐘，果然無Over。自從用DA10至17， F3點5這粒鏡頭了後我才感覺著Pentax 的ASTROTRACER的威力有真正施展。

下昏晚拄著幾若(kuí-nā) 位紮家己的器材起來觀星的新朋友，開講、互相交換觀星的經驗，非常歡喜。

GEM28的goto誠準，追蹤嘛袂䆀，抑毋擱伊的機械設計佮結構uan-ná 差日本製有1節。譬如，伊雙軸的khu-lá-chih干焦會使鎖佇固定的幾个位置，手動時無啥方便。另外，雙軸的khu-lá-chih 放開時完全無阻尼，平衡較僫調整。上麻煩的是彼的座是用2支內六角螺絲固定的，若佇黑暗中無細膩錯手，六角扳手予落去塗跤，彼是比聽鬼仔古擱較恐怖!

Ａ men's talk under the Milky way （ 240sec）

100sec

80secx3

240sec

M8

M27

NGC-281

半暝以SQM量夜空的暗度已經有20.17 mpsas，算是比平均擱較好。

==========

袂使鎖過頭，無，齒縫會變誠大。

用家己會當調整光度的紅色LED來作極軸望眼鏡的照明，比原廠擱較好用。

用MGENII 做漂移來校正極軸，做到2'以內著算誠準。

校正goto 進前一定要先將雙軸踅到零點，並且佇控制器頂執行 Set zero position。

欲將手機仔的Skysafari 佮GEM28 的wifi 相連，愛選CEM-120

會使用手機仔的星圖控制赤道儀goto誠方便。

========

最近鞍部停車場加設了自助納停車費的機器，雖然螢幕光爍爍，毋擱亭仔頂面佮頭前攏有遮板，所以對望眼鏡翕相無啥影像，但是若看著加減會刺目。不而過因為半暝佇停車場內的人差不多攏是星友，所以嘛有人用衫先掩咧，欲納錢時才掀起來。

Pentax 的ASTROTRACER自發明到旦已經差不多欲十五年矣。正港是真方便的發明。