王羅蜜多寫台灣的選舉文化的黑暗面原本就是 jió-toh，我讀過伊的《地獄谷》台文小說集著領教過，最近伊出版的這本台文小說《半䖙島：新十二生相傳奇》除了繼續施展這種工夫，擱再加入奇幻的寓言(gū-giân)風格，揀選十二種動物生相作為每一篇小說的主角。這寡故事發生的背景設佇一个號作“半䖙島”的島嶼，王羅蜜多共動物人格化，或者倒反過來，予人變形出動物的形體抑是能力，交織出奇幻的鄉野傳奇佮都市怪譚。小說牽磕的主題有足濟款，大部份的故事攏互相牽涉形成「互文」。有描寫諞仙仔利用一般民眾對宗教的虔誠來進行垃圾政治，以及描寫選舉文化的黑暗面譬如〈斑甲市〉、〈草猴鎮〉、〈猩猩山〉等等，擱有指涉了真實歷史，重新用魔幻現實包裝加入生相的歷史演義譬如〈水鹿城〉、〈鯪鯉堀〉等等。
較無仝的敘事手路的有〈貓公寓〉，共其他故事比較起來，會使共看作是都市怪譚，故事最後發展出一件殺人案件，予這篇小說變成未完成的狀態唌人的好奇心。
王羅蜜多的動物故事有當時會予我聯想著Miyazawa Kenji (宮澤賢治) 的小說，彼般的奇巧。其中〈烏蟻族〉擱約略仔有卡夫卡的氣味。予狗蟻的尾針刺著了後煞變成會當和狗蟻講話的木桂仙佇家己厝內的花園觀察狗蟻生態，而且佇無仝種的狗蟻的戰爭之間調解，不而過無閒 tshih-tshih 到最後原仔是無采工，上尾仔入侵的紅火蟻予厝邊發現通報里長揣來滅蟻大隊噴藥仔共消滅，這个狗蟻花園也就宣報完全毁滅，毋過木桂老師已經轉去卜卦山舊厝干焦佇厝壁留有一大片狗蟻戰爭的壁畫。這篇小說的尾局敢若挑工留下未完成的伏筆。若是我來寫可能會予木桂仔也去易殺蟲劑毒著煞「領便當」（笑）。
王羅蜜多嘛貫串寫人性的傲慢佮狡詐譬如〈夜婆洞〉、〈猩猩山〉，其中夜婆洞的結局造成的「懸念」誠濟，雖然夜婆使用in 的高科技開發了疫苗解救人類，終其尾人類猶是認為疫災是由夜婆引起的，拍算將in 攏消滅，不而過人類雖然有疫苗幫助逃過死劫最後煞因為疫苗的副作用去著了一種叫閹雞行的症頭，真正是現世報。
另外，〈猩猩山〉騙錢的佬仔真人雖罔最後自食惡果，受伊刻剝、利用的會講人話的猩猩也攏逃走矣，不而過可能因為作者的憐憫，雖罔創造風颱暴雨造成崩山，干焦將雨神猩猩宮佮伊四箍圍仔埋佇塗跤，卻是予彼个救世黨繼續生存落去，是另我較意外的所在，毋過想想的，無的確這就是咱的荒謬社會的寫實。
幾个佇鄉土小說中算是誠常見著的題材，力王羅蜜多的妙手以生相寓言的結構加添袂少趣味，譬如〈海翁嶼〉的故事有鯨魚生態的關懷佮深海的冒險，波蘭本底是足討厭海的，不而過一擺伊佇科博館的沉浸式體驗當中雄雄敢若看著十外冬前失蹤佇海湧內的小弟--阿沙缀著海翁出現，伊認為是小弟猶活佇世間上的兆頭，就按呢伊開始親近大海、海翁，有一擺出海時終於拄著一隻尾溜是金色的抹香鯨(伊稱牠叫「史艷文」)，揣領她去佮小弟阿沙重逢，原來小弟彼年予海翁救去，煞漸漸演化出鰓，而且知影海翁講的話。史艷文波蘭去參觀海底世界的時陣，肖想欲揣寶物的船長偷偷綴佇後壁，伊佮船員後來刣死史艷文，in 也受報應而死，佇故事上尾仔，敘事者講了一段勸世文，是比較其他篇較無仝的寫法(我感覺這篇誠適合改編作歌仔戲)。
另外擱有故事背景是一个龜鱉保護區的〈龜鱉港〉，女主角月曲因為欲傱老爸的醫藥費決定到酒家上班，伊愛慕的人（龜太子）佇水淹頷頸仔之時位豬哥州長的手下救走月曲，表面看起來敢若是台灣民間定定會看見的散食人的愛情故事，毋過掺入神話的元素使著這个故事變了誠傳奇。
描寫信仰文化佮都市開發的利害衝突的有〈鴣黃庄〉，這篇的主題予我想到家自親身拄到的，佮小說相像的代誌，著還最近我兜的家族墓所位置的公墓予台北市政府以都市開發為理由強制徵收，被強迫遷墓到公塔的代誌。咱市民甚至比故事中的角色更加徹底無反抗的能力，甚至無小說內彼種開發成喪葬園區的目標，叫汝遷著愛遷，傳統的風俗文化的根蒂予伊二三个手 凊彩剾除。
總講起來，這是一本充滿趣味又擱有嚴肅議題的小說，四界攏看會著對真實歷史事件佮神話原型的指涉和變形，王羅蜜多以魔幻現實的敘事手路加上動物寓言的趣味，開闊了台文小說的眼界，讀起來不止仔心適。
.jpg)
.jpg)
.jpg)
.jpg)
.jpg)
