踅街買冊(2) 台灣e店，佮大稻埕台灣文化冊店大三角

今年 [台灣e店] ê網路敢若一直被人用DoS攻擊，定定會拄著連袂起--li ê情況，不過拄著這種狀況你會使將網頁reload 幾遍，著會當入去啊，這是店ê 大姊嘛知ê鋩角。

今仔日下昏本來拍算欲去大橋頭食高麗菜飯，毋閣出門進前收著台灣e店ê email 講我訂ê 2本台語册已經來矣，所以我臨時改去公館。

我家己是較習慣讀印佇紙面ê文字，而且，我嘛愛指頭仔指翻册頁、手蹄罩佇紙面ê感覺。有ê紙較幼，摸起來袂輸是玉仔抑是huî-á 滑溜溜，也成嬰仔ê皮膚幼麵麵；若是較粗ê比如再生紙感覺著無仝，敢若佇行田岸路伸手挲過歸片ê稻草，或者是古厝土埆ê壁，若目睭闔闔，幽幽仔閣敢若鼻會著無仝ê味。就按呢，我ia 是愛讀實體ê册。

台灣文史ê册我攏是佇[台灣e店]這種專門佇推廣台灣文學、文化ê獨立書店買（ia-有現流册店、奎府聚、郭怡美……），因為台灣文史ê市場目前猶算小（各位無看--ê 前一陣仔台灣第一間台灣文學系---真理大學台灣文學系講欲停招學生矣?)，所以這寡書店in 有熱情佮勇氣，毋驚軟市，毋是以銷量決定欲賣啥物，決心 teh 推廣本土文化，咱合該然著用(īng)新臺票佮大力幫贊。

大稻埕台灣文化冊店大三角

這3間以佇迪化街ê心臟-中街上ê百年歷史街屋郭怡美册店為頂點，佮其他2間拄好正正框成一个等腰三角形。另外2間是佇大稻埕南爿，捷運中山站邊仔赤峰街ê奎府聚册店，佮捷運大橋頭站北爿，民權國中後壁巷仔內ê現流册店。這3間册店佮台灣e店、三民復北是我較捷去交關--ê。(三民復北有設“台灣文學”、“台灣史”專櫃，誠大範，袂像誠品干焦有“現代中文創作”、“台灣研究”遐龜龜鱉鱉) 。

佇網路抑是別位看著想欲買ê台灣文史ê册，我也定定選擇共這幾間册店訂（你若無趕時間欲挃，我嘛建議逐位共你支持ê獨立書店訂書）。

郭怡美書店是一間日本時代(1922年起--e ) 2進3樓懸ê牌樓厝整修--ê，有真媠ê Baroque style ê徛面，厝內隔間大概仔維持佮古早仝款，四界攏是木材ê裝潢誠雅緻，映著光色，有番仔油灯相-siāng ê温暖。一進一樓架仔頂展示ê攏台灣文化相關ê册，台語ê册雖然無像台灣e店遐濟，毋閣嘛有十外本現現，2樓ê主題是世界，3樓是囥藝術ê册，頂頭閣有一間半樓仔，是文藝展覽ê所在。

位3樓榻榻米椅仔邊向窗仔外看落去，狹狹ê街仔路，踅街ê人挨挨陣陣，若是拄著迓城隍抑是咱人佇過年時閣較鬧熱滾滾，定定嘛kheh ka 袂行路，位遮看出去，無張持時間lo 倒流，流去郭雪湖ê〈南街殷賑〉畫面內ê彼个過去。郭烏隆佇當欲發展、充滿機會ê大稻埕賣黑糖予日本趁著一間厝額，便佇中街、這馬ê所在起了郭怡美商行，郭怡美佮這條街仔2爿其他各式各樣ê百年牌仔樓著是彼个奢颺ê時代繁華ê見證。

徛佇佮鬧熱ê市街干焦隔一片薄薄ê玻璃，煞誠恬靜ê册局內，真清幽，感覺誠夢幻，袂輸是另外一个平行ê世界。

行過天井，2進ê一樓是咖啡廳，2樓是予親子共讀ê空間，有足濟ê囡仔册，不時也會佇遮辦藝文ê講座、活動。郭怡美自舊年開始進行一个公益計劃號作「沃土計劃」，會將逐家佇遮買册ê金額ê 10%囥入去這个計劃ê基金內底，然後不時會邀請國小ê班級學生囡仔來册店內看書，每一个囡仔攏會使選in 上佮意ê一本册，郭怡美著用基金ê費用來買送予in ，這个計劃今年已經得著文化部ê幫贊，會當予閣較濟ê囡仔來揀伊ê第一本册，著安呢掖(iā)閱讀ê種子，予紙册ê清芳沓沓仔湠開。

除了迪化街南北貨佮愈來愈濟ê文創商行、時行ê咖啡店、店頭不時觀光客插插插ê茄芷袋店、媠到誠超過ê黄昏碼頭以外，附近嘛有不少ê文化景點，譬如李春生紀念教當堂、莊協發、新文化運動紀念館、渭水驛站、天馬茶房遺址……等等。

真適合我這種愛行路ê人來散步，無欲買册ê時我嘛是會來踅街，順紲去永樂市場外呷我上愛ê台南塗魠米粉羹，然後去郭怡美，行入2進去點1杯Latte 抑是麥仔汁，坐落來休睏、看書，這嘛是一種支持册店ê方法。