踅街買冊(2) 台灣e店，佮大稻埕台灣文化冊店大三角

今年 [台灣e店] ê網路敢若一直被人用DoS攻擊，定定會拄著連袂起--li ê情況，不過拄著這種狀況你會使將網頁reload 幾遍，著會當入去啊，這是店ê 大姊嘛知ê鋩角。

今仔日下昏本來拍算欲去大橋頭食高麗菜飯，毋閣出門進前收著台灣e店ê email 講我訂ê 2本台語册已經來矣，所以我臨時改去公館。

我家己是較習慣讀印佇紙面ê文字，而且，我嘛愛指頭仔指翻册頁、手蹄罩佇紙面ê感覺。有ê紙較幼，摸起來袂輸是玉仔抑是huî-á 滑溜溜，也成嬰仔ê皮膚幼麵麵；若是較粗ê比如再生紙感覺著無仝，敢若佇行田岸路伸手挲過歸片ê稻草，或者是古厝土埆ê壁，若目睭闔闔，幽幽仔閣敢若鼻會著無仝ê味。就按呢，我ia 是愛讀實體ê册。

台灣文史ê册我攏是佇[台灣e店]這種專門佇推廣台灣文學、文化ê獨立書店買（ia-有現流册店、奎府聚、郭怡美……），因為台灣文史ê市場目前猶算小（各位無看--ê 前一陣仔台灣第一間台灣文學系---真理大學台灣文學系講欲停招學生矣?)，所以這寡書店in 有熱情佮勇氣，毋驚軟市，毋是以銷量決定欲賣啥物，決心 teh 推廣本土文化，咱合該然著用(īng)新臺票佮大力幫贊。

大稻埕台灣文化冊店大三角

這3間以佇迪化街ê心臟-中街上ê百年歷史街屋郭怡美册店為頂點，佮其他2間拄好正正框成一个等腰三角形。另外2間是佇大稻埕南爿，捷運中山站邊仔赤峰街ê奎府聚册店，佮捷運大橋頭站北爿，民權國中後壁巷仔內ê現流册店。這3間册店佮台灣e店、三民復北是我較捷去交關--ê。(三民復北有設“台灣文學”、“台灣史”專櫃，誠大範，袂像誠品干焦有“現代中文創作”、“台灣研究”遐龜龜鱉鱉) 。

佇網路抑是別位看著想欲買ê台灣文史ê册，我也定定選擇共這幾間册店訂（你若無趕時間欲挃，我嘛建議逐位共你支持ê獨立書店訂書）。

郭怡美書店是一間日本時代(1922年起--e ) 2進3樓懸ê牌樓厝整修--ê，有真媠ê Baroque style ê徛面，厝內隔間大概仔維持佮古早仝款，四界攏是木材ê裝潢誠雅緻，映著光色，有番仔油灯相-siāng ê温暖。一進一樓架仔頂展示ê攏台灣文化相關ê册，台語ê册雖然無像台灣e店遐濟，毋閣嘛有十外本現現，2樓ê主題是世界，3樓是囥藝術ê册，頂頭閣有一間半樓仔，是文藝展覽ê所在。

踅街買冊

昨昏趁還有日頭，早仔起（cai1-khi2）我先出門去做每月Routine的空課，煞了後轉厝馬上揹仔揹起來就走去捷運中山站邊仔的赤峰街踅街，順紲（續）欲去買書。

這條街兩爿巷仔有一排閣一排古早的二層樓仔厝，in7的陽台大部份攏有Ke3-Ke7的特殊的造形的欄杆佮鐵花窗仔，一支一支的欄杆有外形吶像花矸仔，有的四四角角花草敢（干）若像彎糕仔抑是綠豆糕，正是古早的Sutairu(style)。有足濟間厝開作時行、有創意的店面，足濟摔拍的文藝青年來遮踅街，呷飯買物，我嘛有看着幾若个外國來的。一位阿姐行過面頭前一扇玻璃門，玻璃門頂面印著“進店暴富”，實在會唌人，邊仔的壁堵漆著一尾龍，位敢若是〈神奈川沖浪裡〉的海涌中湓（bun3）出來，尾溜強欲摔(sut7)著彼位阿姐。

街仔頂嘛閣有幾間鐵工廠有佇做生理，使人好奇古早時彼個歹鐵仔街是生作啥款，應該是另外一款鬧熱滾滾，車床、西工的聲音，流汗的味，日頭曝到衝煙的馬路。

踅了一輪了後，我揣著彼間奎府聚冊局，這間册局主要賣的是佮台灣、本土文化有關係的書佮文創商品，伊嘛有座位會當予人客踮內底啉咖啡，有時嘛會辦活動。

目珠佇冊架仔頂巡來巡去時阮注意著不時有手寫的細張的半圓字條散插、夾佇書的下面，倚較近咧斟酌看原來是對彼本書的心得或者介紹，真有心。

我看着一本諸葛四郎的ㄤ仔標冊感覺袂䆀，另外嘛有想要買陳耀昌的《傀儡花》，但是因為欲省錢所以毋敢烏白買，再三考慮，最後我干若買陳耀昌的《福爾摩沙三族記》佮李敏勇的詩集《詠嘆調》，其他的，下逝來才閣拍算，即時自行入册局耳孔就一直聽到古早的時鐘的時鐘墜的“噠噠噠”，變作整點的聲音佇提醒，已經三點囉。續落來欲坐捷運去公館，因為我google胡長松的小說集《金色島嶼之歌》干若佇“台灣e店”才有現貨。

台灣e店已經搬去溫州街83號七樓，明明照google地圖chhue3（揣，找）路，毋閣螢幕頂代表我的藍點已經佇目標邊踅一輪矣我卻是看無叨位有一棟七樓的大樓。共一間一間的門牌號碼斟酌看，唉，「遠在天邊，近在眼前」，原來伊現現就佇咧路邊，但是舊舊啊無成商業大樓，覕(bih2)佇徛家之間，無怪我目珠展大蕊嘛看無。

揤電鈴講是欲來買冊，大門應聲拍開，加在裡面竟然有電梯，這棟當在起的時應該是算足先進的。上七樓左斡，行入敢若是普通徛家的一个小小的門，內面不止啊闊，歸排架仔攏是囥佮咱台灣有關係的册、CD佮文創什貨，幾若間房間嘛是。你哪是對了解台灣文化有興趣，天堂應該就是生做這款模樣。

櫃台的阿姐當佇拍電腦，伊一知影我欲揣胡長松的小說，馬上就共我講佇叨一格，我想伊逐工佇遮一定足熟矣，嘛足幸福!