踅街買冊

昨昏趁還有日頭，早仔起（cai1-khi2）我先出門去做每月Routine的空課，煞了後轉厝馬上揹仔揹起來就走去捷運中山站邊仔的赤峰街踅街，順紲（續）欲去買書。

這條街兩爿巷仔有一排閣一排古早的二層樓仔厝，in7的陽台大部份攏有Ke3-Ke7的特殊的造形的欄杆佮鐵花窗仔，一支一支的欄杆有外形吶像花矸仔，有的四四角角花草敢（干）若像彎糕仔抑是綠豆糕，正是古早的Sutairu(style)。有足濟間厝開作時行、有創意的店面，足濟摔拍的文藝青年來遮踅街，呷飯買物，我嘛有看着幾若个外國來的。一位阿姐行過面頭前一扇玻璃門，玻璃門頂面印著“進店暴富”，實在會唌人，邊仔的壁堵漆著一尾龍，位敢若是〈神奈川沖浪裡〉的海涌中湓（bun3）出來，尾溜強欲摔(sut7)著彼位阿姐。

街仔頂嘛閣有幾間鐵工廠有佇做生理，使人好奇古早時彼個歹鐵仔街是生作啥款，應該是另外一款鬧熱滾滾，車床、西工的聲音，流汗的味，日頭曝到衝煙的馬路。

踅了一輪了後，我揣著彼間奎府聚冊局，這間册局主要賣的是佮台灣、本土文化有關係的書佮文創商品，伊嘛有座位會當予人客踮內底啉咖啡，有時嘛會辦活動。

目珠佇冊架仔頂巡來巡去時阮注意著不時有手寫的細張的半圓字條散插、夾佇書的下面，倚較近咧斟酌看原來是對彼本書的心得或者介紹，真有心。

我看着一本諸葛四郎的ㄤ仔標冊感覺袂䆀，另外嘛有想要買陳耀昌的《傀儡花》，但是因為欲省錢所以毋敢烏白買，再三考慮，最後我干若買陳耀昌的《福爾摩沙三族記》佮李敏勇的詩集《詠嘆調》，其他的，下逝來才閣拍算，即時自行入册局耳孔就一直聽到古早的時鐘的時鐘墜的“噠噠噠”，變作整點的聲音佇提醒，已經三點囉。續落來欲坐捷運去公館，因為我google胡長松的小說集《金色島嶼之歌》干若佇“台灣e店”才有現貨。

台灣e店已經搬去溫州街83號七樓，明明照google地圖chhue3（揣，找）路，毋閣螢幕頂代表我的藍點已經佇目標邊踅一輪矣我卻是看無叨位有一棟七樓的大樓。共一間一間的門牌號碼斟酌看，唉，「遠在天邊，近在眼前」，原來伊現現就佇咧路邊，但是舊舊啊無成商業大樓，覕(bih2)佇徛家之間，無怪我目珠展大蕊嘛看無。

揤電鈴講是欲來買冊，大門應聲拍開，加在裡面竟然有電梯，這棟當在起的時應該是算足先進的。上七樓左斡，行入敢若是普通徛家的一个小小的門，內面不止啊闊，歸排架仔攏是囥佮咱台灣有關係的册、CD佮文創什貨，幾若間房間嘛是。你哪是對了解台灣文化有興趣，天堂應該就是生做這款模樣。

櫃台的阿姐當佇拍電腦，伊一知影我欲揣胡長松的小說，馬上就共我講佇叨一格，我想伊逐工佇遮一定足熟矣，嘛足幸福!

我干那頭一擺行入kam仔店的囡仔，逐格看逐个房間逡，誠濟四秀仔攏想欲買。因為反（bing）著冊內的宋澤萊的推薦，我閣買了胡長松的《幻影號的奇航》，續落來，我看著一本南科考古的書，頂頭註文第一册，我綴嘴問彼个阿姐有第二册無，伊馬上就走入傷內底的房間，無若久就手提一本嘛是彩頁的第二册，抑毋閣這本加足大本的，這廂(聲)害啊！這本愛九百扣呢!但忍咧會著內傷，而且佇別位我毋捌看過有這兩本，加在會當鑢卡，鑢卡較袂痛（咦？），行出去愛呷塗啊！

結數（siau3)時我看到一台足水的古董sharp收銀機，毋知有幾若十年歷史？我臆全台灣應該無賰幾台閣好好會動作。歸台黃到發光，時間的光，悠悠恬恬（tiam3-tiam7）。

*本篇羅馬字使用台羅

*個人用字較隨興，建議參考教育部公佈的標準。

1