3/21
春天的暗暝，北斗七星早早著peh起去小觀音山的山尾溜，位北斗星／大熊座開始，向南經過獵狗座、（Berenice的）頭鬃座、獅仔座、室女座、烏鴉座到半人馬座為止，一條差不多三十度闊，自北迵到南爿的夜空範圍，星系揢到插插插。佇鞍部天清的暗暝，你若是用8"的望遠鏡，至少會使看著其中幾若十粒光度較光的星系，自北到南一粒一粒寬寬仔欣賞，袂輸春天佇河津川的步岸散步欣賞櫻花，誠是美不勝收。
我共按北斗星開始的這逝眼視觀星路線號做春天的星系走健。
曷若是共這逝星系步岸向北斗星的北爿延伸，佮秋冬的玉夫座、天爐座、波江座內面的彼寡星系連做伙，這歸大逝的星系會當用8‘’鏡佇鞍部看著的就攏總至少有100个以上（個人目前佇鞍部眼視素描的記錄）。
我定定佇腦海內思想這條星系集倚的款勢，敢若看會著彼个大尺度的結構一包含咱的銀河系所屬的室女座超星系團 (Virgo Supercluster)[1]。好比旋藤的kazura，湠延一億光年。
下-昏暗的天氣誠好，山頂雖然溫度無到十度，不而過無啥風，所以並袂真寒，我特別紮我的Takahashi µ-210 起來鞍部，著是想欲溫習夜空中的這逝星系步岸，另外就是想欲用8" 鏡看有法度看著前幾工佇"Galaxy fromation" 這本册頂看著的兩个超級大龐的橢圓星系一 NGC 4874 佮NGC 4889 無？
In 的位置佇離咱有3億外光年的頭鬃座超星系團 (Coma Supercluster)的中央，雖然離遐遠，毋擱因為這兩粒星系中央誠光（無怪in 有另外一種稱呼號做central dominant galaxies），加上in的星等有12等，算不止仔光，所以真有機會透過8"望遠鏡親目看著。
七點捅到停車場，星友文正早已經tshāi好伊彼隻S50 智慧望眼鏡佇走另類的Messier 寫真馬拉松，著是拍算佇一暗的時間以內將110个Messier 天體翕起來，因為這寡天體佇天頂分佈的位置的特性，一年當中干焦佇春分前後這段期間有法度佇一暗內看著全部。毋擱因為鞍部的東西爿kē 的所在攏有遮閘 (也是遮光害較小的原因)，所以出日前佮日頭落山後彼陣子佇地平附近的天體就看袂著，欲共全部 Messier 天體 hôo起來誠困難。
我共赤道儀、望遠鏡組立起來，對好極軸了後先泡一碗麻油雞泡麵來食，看夜色猶未全暗，先將望遠鏡對準北斗七星的戽杓尾附近的M51 星系觀察。其實普通時咱講的M51實在包括2个星系，M51捲螺仔旋星系佮佇伊北爿邊，袂輸予M51上外面的旋股牽著的，細粒誠濟的NGC 5194星系，相片看起來親像一隻露螺。毋擱透過望遠鏡用目睭看的無仝，愛佇無光害的所在才有可能看著in彼逝互相干涉的旋股。
今仔的seeing 佮透明度攏真讚，將望眼鏡的視野徒去M51的所在連鞭就看著兩个足光的星系仁，共孜孜相一睏仔，目睭習慣暗度了後，略略仔看會出位M51星系仁向東向伸出的1節旋股，使用averted vision的技巧(一種斜目看的技術)，另外伊倚NGC 5194彼爿，看會出佇2个星系中間有一段旋股，殕殕仔若有若無。
紲落來換徒去戽杓頭天璇星邊仔的M108星系佮M97貓頭鳥行星狀星雲，加上LP-2(OIII加Hb)濾鏡了後貓頭鳥圓圓的面模更加顯目，用150倍以上，黑黑的2粒目睭漸漸浮現。
看煞這2个目標，另外一个星友「石頭」拄下玻趕起來，伊嘛是用S50 teh 翕相。最近智慧望眼鏡誠衝。
我看頭鬃座懸度己經超過45度以上矣，著開始進行下昏暗主要的觀察。有鏡筒頭前墘的Quick finder的輔助來繩第一粒碇星，加輕鬆誠濟，找天頂的星時袂彎腰到強欲閃著。接續才用7倍的找星鏡佮60倍1.2度視野的目鏡，免行幾步就揣著NGC 4889 佮4874 這兩粒大橢圓星系的位置，換300倍來觀察，2粒星系仁不止仔光，明明明，但是因為離足遠，干焦比天星較大粒淡薄仔。毋閣一想著in 離咱有3億光年遐遠，即馬飛入我目睭是in 3億年前發出的光線，我看著會是in 3億年前的模樣，實在使我感動。
看著這2粒cD星系今暗的目標就算達成矣。但是晉才拄翻點無若久，才開始進入真正的暗夜爾爾，天況當好，若即馬下山返去睏，感覺不止仔可惜，所以我擱共望眼鏡徒向南，去揣拄過子午線的佇室女座的M104 闊邊帽仔星系。
M104的星系仁誠肥閣明顯，毋擱中央的暗帶看無啥清楚。
欲倚1點的腳兜，忽然間半暝月著已經出現佇東南爿，袂輸拄位樹林仔中央跳起來，干焦擘一半的柑仔，毋擱較黃，鮮澤閣清氣，誠媠。伊炤落來的光線予四箍圍仔的景物佮看星的人攏有分明的黑影。月娘的出現拄好予我藉口說服自己落山(因為夜空會變光足濟)，甘願開始收拾家私。
(記錄的星景相片使用的相機是Pentax K3II , DA 10-17 鏡頭, ASTROTRACER 曝光80秒至120秒不等, 相片已經用 Photoshop wide lens adaptation 共魚眼變形搝正）
3/30初稿
沒有留言:
張貼留言
Welcome, please feel free to leave your messages 歡迎留言與指正