鷄南山(一)

1

欲按通北街peh 起去鷄南山，平常時我會挑工行經過實踐大學ê校園(hāu-hn̂g )內。實踐大學細細間仔，但是每遍佇內面散步攏會感受著這間設計學校ê活力，不時會看四界囥ê學生ê宿題作品，有時我嘛會專工行入來看 in ê畢業展覽。

行過排彎族ê石板厝，資源教室外口有幾欉梅花，每冬，大約仔佇大寒了後 in 著會大開，牛奶白牛奶白ê花蕊像笑粉ê阿娘仔ê面遐爾媠，時到蹛附近ê人嘛會走來賞花翕相。

梅花欉後是校園內我上佮意e建築--圖資大樓，佮伊對面ê體育館。

2棟仝是素雅大方ê清水模 控固力(khōng-ku-lí)大樓，但無仝ê用途，設計嘛無仝，毋擱攏是四四方方，大量ê網格、大玻璃窗仔，挑懸ê亭仔跤、穿堂，創造予人感覺透明、流動ê公共空間，袂輸是位塗跤生出來、躘懸--ê自然。in 對起好使用到這馬也十五冬啊(姚仁喜設計，2009完工)，外型嘛袂退流行，看 起來仝款足有現代感，外牆嘛維持了真好，無外口ê一般徛家大樓久來定定有，落了雨敢若流湯ê垃儳水ê烏跡。應該伊厝尾頂排水有做特別ê設計，著像資源教室頭前彼堵清水模ê壁頂ê洩水溝。

隔一片草埔，這兩楝清水建築坐佇龍、虎爿對看袂輸是鐘樓佮鼓樓，北爿無外遠ê所在著是翠青ê雞南山，這兩棟建築恬恬無聲，好比2位禪師對坐。

草埔是親子活動ê好所在，爸母𤆬囡仔來予 in 佇草埔頂走耍，有時亦有教練佇遮教囡仔踢跤球。草埔邊有一排東西向ê多邊形ê採光井，彼是予地下室採光ê天窗，袂輸1座1座ê小島，小島邊有一條柴枋敆起來ê路橋，我teh 想若毋是學校，無定著建築師會共這片草坪換作一个水池（像嘛是伊設計ê農禪寺）。

佇草埔下跤，兩棟大樓ê地下室是相透ê，有教室、圖書館佮會議廳。若行入地下室，攑頭著會看著採光井，日時自然光位無仝形ê天窗掖落來，光線隨日頭ê角度變化，閣予米白ê石地板反射，空間充滿温柔溫暖ê光線，我Romantic 共想，若下暗時攑一隻䖙椅踮遮䖙咧看星，彼星垣這點鐘佇這格，後1點鐘著徙去彼格，無仝季節ê星天亦會無仝，敢若teh 搬電影，時間ê走馬燈，建築師真正是自然光ê導演。

我行過懸擱闊ê體育館一樓中庭，位西出口行出學校，位遮直行著會接去通北街145巷。只要沿山邊點馬膠路行著會行到劍潭山步道ê入口。

2

今仔日我無欲行山邊，我行下跤ê 31巷彼條自家用無法度過ê小巷仔。巷仔口踦家ê後尾ê水池邊有1欉金鳳花開到誠茂，風來弄伊，像歸陣ê蝴蝶翅仔颺來颺去，in 是穿有黃 lè-sìre ê貢貢紅絨布衫ê媠姑娘。遐後埕中央 tshāi 1隻予囡仔耍ê 塑膠 ê sir-bé-lí-lái(溜滑梯)，毋閣這後院1年迵天我猶毋捌看過有人，更加免講 in兜ê囡仔。佇溜梯南爿牆跤囥兩个鉛線籠仔，敢是有飼鳥鴨？

繼續行落去，有幾戶使人懷念ê紅磚仔低厝照常出現眼前，in 嘛是我愛行這條巷仔ê因端之一。

in 厝尾頂已經是無紅瓦，攏崁鐵枋矣。因為幾十冬ê紅瓦免講毋是遮破遐破防水嘛早著無效啊，見若落大雨厝內著會落小雨漏水(阮較早古厝著是按呢)。欲作一擺解決，厝頂蓋白鐵仔枋是上有效佮省錢ê方法，我想這亦是按怎咱台灣ê「鐵皮屋」遐濟ê原因之一，認真講起來實在是 bô-ta-uâ (無奈何)。

踦佇牆仔外斟酌共相，正身無凹壽佮步口，內埕狹狹，和印象內細漢時阮舊店厝(遐早已經拆掉變重劃區起大樓矣)隔壁ê正身佮護龍比起來遮細間足濟，平常時嘛罕見人 teh 行，今仔煞予我看著有囡仔佇遐嘩。

我想起阮囡仔時定定位人兜ê步口廊，佇正身護龍走來軁去覓相揣，正身前內埕誠闊，阮攏佇遐奕搧尪仔標、掔(khian)尪仔仙、彈金珠仔，佇塗跤繪格仔跳格仔……，定定嘛奕到日頭欲落山，傳來煎匙硞鼎仔挵到 khīng-khīng-khōng-khōng ê 煮菜聲，攑頭燃柴煮飯ê白煙ê長蛇佇四界衝懸升天，炒肉臊ê味直直唌人，聽著厝內人teh 喝食飯才知影欲轉。

我愛看囡仔ê笑容，我為 in 未來會拄著親像萬花筒ê新奇、美麗ê地球世界感覺歡喜，我心內祝福in 攏會當健康、順序大漢。雖罔有歲仔我已知影，毋是逐項代誌攏會像細漢時認為ê遐爾單純樂暢，總是有傷心佮遺憾ê時陣，我已啖過世事無常，嘛見過早夭ê性命，無聲無說著像未曾未蔫著予人挽遏ê花欉，無捨無施(bô-siá-bô-sì) 。但是我猶原是替in 歡喜，我想，這个世界誠媠，猶原值得來行一逝。但是日子ê鰗鰡掠亦掠袂牢，像山路上奸巧ê杜定(石龍子)，你lip 亦 lip 袂著，著算予貓仔㨑著伊嘛會家己斷尾 suan去，所以呀，恁一定愛好好珍惜。

3

欲斡去接145巷ê上崎進前擱有1間現代已罕得看著ê塗墼厝，伊ê腰身下跤是鞏卵石，應該至少有半世紀以上ê歷史矣--吧?感謝這戶主人共保存落來，伊一定有真濟ê故事，看過足濟ê物換星移？

接起145巷，擱轉1个彎，來到165巷ê劍潭山步道入口前ê崎仔，這个坡誠趨，若無愛peh 崎--ê，邊仔有柴格ê樓梯，我著是愛peh 樓梯--ê，我捌算過，到光明院外口ê步道入口石牌為止，柴梯攏總有320坎，擱來 peh 差不多815个石坎著會接起直透「老地方」ê控固力小路。「老地方」遐有1个外型像紙飛機摺作三角ê、突出稜線ê材格ê平台，強欲飛出去ê意象，佇遐會使看松山飛行機場ê飛機起飛、降落。29暝看101煙火嘛誠適合。

佇這个斜坡我捌幾改拄著1位曲痀到強欲九十度ê阿婆，伊攏固定捒一台捒車，㧣1下㧣1下，一步一步寬寬仔teh peh 崎，我臆伊應該是蹛佇頂仔半山坪。第一擺我停落來問伊敢愛我共鬥捒車仔，伊夯頭面笑笑講免啦，講伊曲痀著愛捒這台捒車才有法度行，毋是行無法--ê。伊紅膏赤蠘，看起來不止仔康健，擱會共我講笑，我嘛共伊話仙幾句，祝伊食百二。毋擱連今仔日最近幾擺來遮peh 山煞攏無拄著伊，毋知伊身體猶原勇健無？

Peh 到光明院外，看著塗跤囥1 kha 塑膠籃仔，貯有幾把蕃薯葉仔，邊仔擱有1 kha 頂仔有寫「結緣」二字ê 紙箱，可能是拄囥無偌久，內底空空，干焦硩1塊大石頭。想起阮阿母愛食煠蕃薯葉仔搵豆油膏，我位揹仔內撏幾十箍銀角仔囥紙箱內，抽1把蕃薯葉仔貯入塑膠袋仔，想講落山ê時紮轉厝，會使煠來予厝內逐个食。